کوئٹہ۔ 21 مارچ (اے پی پی)پاکستان پیپلزپارٹی بلوچستان نا میڈیا کوآرڈی نیٹر حیات خان اچکزئی جی پی اے کمپلیکس گوادر اٹی دہشت گرد آتا جلہو ءِ بے سہب کننگ آ سیکورٹی فورس آتا بہادر و دلیر ورناتے خراج تحسین پیش کرسا پارینے کہ سیکورٹی فورس آک وخت آ دہشت گرد آتا برخلاف کارروائی کرسا سرکاری ملکیت و الس ءِ جونی نسخان آن بچفیر۔ داڑے جاری مروک اسہ بیان اسے ٹی حیات خان اچکزئی پارےکہ دہشت گرد آک تینا درملکی آقاتے خوش کننگ کن جی پی اے کمپلیکس آ جلہو کریر ولے سیکورٹی فورس آتا نرزور ورناک دلیری نا درشانی ءِ کرسا دہشت گرد آتے خلسا سرکاری ملکیت والس ءِ جونی نسخان آن بچفیر۔ اوپارے کہ دہشت گرد آک پاکستان اٹی نزوری ودی کننگ کن فورس آتا ورنا و سرکاری تنصیب آتیا جلہو کننگ ءُ داوڑنا زموار آک ہچ ءُ رعایت اسے نا حقدار افس ، اوپارے کہ پاک فوج و ایلو سیکورٹی ادارہ غاک ملک انا دفاع و الس نا جان و مال انا رکھ اکن ہروخت تیار ءُ و دہشت گرد آتے ہچ ءُ حالیت اسے ٹی اوفتا ناپاک عزم آتیٹی سرسہب مننگ کن اِلیپسہ۔
