کوئٹہ۔ 21 مارچ (اے پی پی)آل بلوچستان پروگریسو پرائیویٹ اسکولز ایسوسی ایشن (رجسٹرڈ) نا صوبائی صدر محمد نواز پندرانی و ایلوعہدیدار آک ڈائریکٹر ایجوکیشن بلوچستان عبدالواحد شاکر بلوچ نا بدلی ءِ علم شمنی اس گوندسا خواست کرینو کہ اونا بدلی ناپرمان تے دمدستی وڑاٹ پدی ہلنگے۔ داڑے جاری مروک اسہ بیان اسے ٹی اوپارے کہ آل بلوچستان پروگریسیو پرائیویٹ اسکولز ایسوسی ایشن اسہ مخلص ، ایماندار و تعلیم دوست ڈائریکٹر ایجوکیشن عبدالواحد شاکر بلوچ نا بدلی نا مذمت ءِ کیک۔ اوفک پاریر کہ عبدالواحد شاکر نا دور اٹی محکمہ تعلیم و خاص وڑاٹ پرائیویٹ اسکول آتون گچین و علم دوست رویہ مسنے اسہ ہندن ءُ آفیسر اسےنا بدلی آن ودی مروک آ خورکی ءِ پُرکننگ مفک۔ اوفک پاریر کہ آل بلوچستان پروگریسیو پرائیویٹ اسکولز ایسوسی ایشن وزیراعلیٰ بلوچستان، چیف سیکرٹری و ایلو بڑزکو کمامدار آتیان خواست کیک کہ ڈائریکٹر ایجوکیشن عبدالواحد شاکر بلوچ نا بدلی نا نوٹیفکیشن ءِ منسوخ کرسا اودے دُوارہ ڈائریکٹر ایجوکیشن بلوچستان تعینات کننگے۔
