اسلام آباد۔ 01 فروری (اے پی پی) نگران وزیراعظم انوارالحق کاکڑ و مالدیپ نا صدر ڈاکٹر محمد معیزو ہڑتوم آ کنڈآتا تعلقداری نا مون آ دننگ، خاص وڑاٹ واپار و چاگڑدی گام گیج آتا خصوصی بابت کمکاری ءِ ودفنگ کن پوسکن ءُ کسر پٹنگ آ امنا کریر۔ پنچ شنبے نادے آ وزیراعظم آفس نا میڈیا ونگ آن جاری بیان نا رداٹ نگران وزیراعظم انوارالحق کاکڑ ءِ جمہوریہ مالدیپ نا صدر ڈاکٹر محمد معیزو ٹیل فون کرے۔ ٹیل فون نا مسخت ابوظہبی ٹی اقوام متحدہ نا فریم ورک کنونشن آن کلائمیٹ چینج(کوپ۔28) نا فریق آتا کانفرنس نا28 می دیوان نا وخت آ 2 دسمبر 2023 آ مروک آ اونا اوڑدہی ٹی مروک آ گپ وتران نا عمل ءِ مون آ دروئی ئس۔ ہڑتوم آ راہشونک تین پہ تینی تعلقداری ءِ سوگو کننگ و واپار و چاگڑدی گام گیج آتیا چکار کرسا تین پہ تینی کمکاری ءِ ودفنگ نا وارخواہی پٹنگ آ امنا کریر۔ ہڑتوم آ راہشونک گیشتر علاقائی کمکاری نا کمک اٹ سویلی ایشیاٹی امن و شونداری کن کاریم کننگ نا است خواہی نا ہم درشانی ءِ کریر۔
