کوئٹہ۔ 01 فروری (اے پی پی)جمعیت علماء اسلام نا راہشون و بلوچستان اسمبلی نا حلقہ پی بی 46 آن اومیتدار سردار احمد خان شاہوانی پارینے کہ جمعیت علماء اسلام ملک اٹی اسلامی نظام نا نفاذ و الس نا ویل آتے ایسر کننگ کن جہد کننگ ءِ الس 8 فروری آ ’’کتاب‘‘ آ مہر خلسا جمعیت علماء اسلام نا اومیتدار آتے سرسہب کیر جمعیت علماء اسلام الس ءِ مایوس کپک۔ داہیت ءِ او پنچ شنبے نادے آسریاب روڈ آ گچین کاری مہم نا چرجوئی ٹی گچین کاری دفترنا بنا و چندی کارنر میٹنگ آتیان تران کرساپارے۔ سردار احمد خان شاہوانی پارے کہ جمعیت علماء اسلام نا سرکڑدہ و کارندہ غاک اللہ نا ڈغار آ اللہ نانظام نا نافذ کننگ کن جہد کننگ ءُ نن الس نا خذمت ءِ عبادت تکسا کینہ الس آ احسان کپنہ۔ اوپارے کہ جمعیت علماء اسلام نا مستین اٹ گچین مروک آ نمائندہ غاک الس نا بے رنگ و نسل خذمت ءِ کرینو الس 8 فروری آ مفاد پرست و کرپٹ زموار آتے طاقت اٹ مسترد کیرہ۔ اوپارے کہ کتاب بدلی و امن نا نشان ءِ۔ اوپارےکہ جمعیت علماء اسلام نا ودوک آمقبولیت نا سوب آن مخالف آک ہبکہ مننگ نا گواچی مسنو واو جمعیت نا برخلاف منفی پروپیگنڈا کننگ ءُ ولے اوفتے بے سہبی آن بیدس ہچ اس رسینگپک۔ اوپارے کہ جمعیت علماء اسلام ہمو اسٹ انگا سیاسی و مذہبی جماعت ءِ ہرا الس ءِ ویل آتیان نجات ترفنگ نا لائخی تخک الس 8 فروری آجمعیت علماء اسلام نا اومیتدار آتا گچین کاری نشان ’’کتاب‘‘ آ مہر خلسا اوفتے سرسہب کے۔
