کراچی۔ 01 فروری (اے پی پی) ترجمان سندھ رینجرز نا کنڈآن پنچ شنبے نادےآ جاری اعلامیہ نا رداٹ ہیڈ کوارٹرز پاکستان رینجرز (سندھ) اٹی ڈی جی رینجرز( سندھ) میجر جنرل اظہر وقاص نا کماشی ٹی اسہ بڑزکو کہول انا دیوان اس اڈہلک۔ دیوان اٹی کراچی شار انا امن و ایمنی نا حالیت خاص کر جنرل الیکشن نا بست وبند آتا خصوصی جاچ ءِ ہلنگا۔ دیوان اٹی آئی جی پولیس، صوبائی الیکشن کمشنر سندھ، ایڈیشنل آئی جی کراچی، اسپیشل سیکرٹری ہوم ڈپارٹمنٹ، سیکرٹری سروسز جنرل ایڈمنسٹریشن اینڈ کوآرڈی نیشن ڈپارٹمنٹ ، کمشنر کراچی، پولیس ، رینجرز و حساس ادارہ غاتا بڑزکو آفیسر آک بشخ ہلکر۔ دیوان اٹی کانود نافذ کروک آ ادارہ غاک مچ آ صوبہ ٹی جنرل الیکشن اٹی سیکورٹی ءِ پک کننگ کن کروک آ گام گیج آتا سرجمی اٹ جاچ ءِ ہلکر و دا بابت کروک آ لائحہ عمل نا منظوری ءِتسر۔ دیوان اٹی فیصلہ کننگا کہ رینجرز و پولیس نا کنڈآن جنرل الیکشن اٹی اسیجائی فلیگ مارچ و اسنیپ چیکنگ نا عمل ءِ پین گچین کننگک تانکہ داخلی و خارجی کسر تا سیکورٹی ءِ پک کننگ مرے و سندھ رینجرز نا دستہ بطور کوئیک ریسپونس فورس ایریا ٹی تعینات مریک ۔ دیوان اٹی داہیت آ زور شاغنگاکہ جنرل الیکشن نا بابت صوبائی حکومت و الیکشن کمیشن نا کنڈآن تروک آ پرمان تے مون آتخسا مروجہ کانود و ضابطہ اخلاق نا پورو پاسداری ءِ ہرممکن وڑاٹ پک کننگک و دانا خلاف ورزی ءِ کروک آ زموار آتا برخلاف سخت تادیبی کارروائی کننگک۔ اعلامیہ ٹی الس آن ہم خواست کننگانے کہ او ہروڑنا شرپسند، شکبر سرگرمی و ناخوش گوار واقعہ نا دمدستی حوال ءِ تعینات رینجرز کارندہ، رینجرز ہیلپ لائن 1101آ ، رینجرز کمکار وٹس ایپ نمبر 03479001111آ کال یا ایس ایم ایس نا کمک اٹ ایتر۔
