پاکستان اٹی سیل و سوات نا مون آدننگ پاک امریکہ السی رابطہ غاتا مون آ دننگ اٹ اہم ءُ کڑد اس ادا کننگ کیک، پاکستانی سفیر مسعود خان

واشنگٹن۔ 31 جنوری (اے پی پی) امریکہ ٹی پاکستان نا سفیر مسعود خان پارینے کہ پاکستان اٹی سیل و سوات نا مون آ دننگ پاکستان و امریکہ نا نیام اٹ السی رابطہ غاتا مون آ دننگ اٹ اہم ءُ کڑد اس ادا کننگ کیک، نیویارک اٹی اڈ ہلوک ٹریول اینڈ ایڈونچر شو 2024اٹی پاکستان نا قدرتی حسن، دودوربیدگ و تاریخ تخوک پاکستان پویلین جہانی برادری ءِ متاثرکرینے، داڑآن نئے بیرہ سیل وسوات نا صنعت بلکن ملک انا گچین دروشم ءِ تالان کننگ اٹ  کمک رسینگک۔ داخیال آتا درشانی ءِ او وزیر ڈٹ بندی و شونداری گلگت بلتستان راجہ ناصر علی خان مقپون تون واشنگٹن اٹی پاکستانی سفارت خانہ ٹی اوڑدہی ٹی کرے۔ پاکستانی سفیر وزیر ڈٹ بندی گلگت بلتستان ءِ سرسہب شوانا اڈتننگ آ مبارکبادی پیش کرے ہرا ملکی سیل و سوات نا کچ ءِ پین تالان کیک۔ وزیر ڈٹ بندی و شونداری گلگت بلتستان ملکی سیل و سواتی لائخی ءِ جہانی پلیٹ فارم آ سرسہبی اٹ تالان کننگ نا بابت نیویارک اٹی پاکستانی قونصلیٹ و واشنگٹن اٹی پاکستانی سفارت خانہ نا کنڈآن پبی کمکاری آ منت واری ءِ ہرفے۔ او پاکستان نا سیل و سوات اٹی امریکی شاری تا است خواہی آ ہیت کرساپارے کہ گلگت بلتستان آ بروک آ درملکی سیل و سواتی تیٹی امریکی شاری ارٹ میکو نمبرآٹو ہرا گلگت بلتستان اٹی چندی وڑنا سیل و سوات بشمول چاگڑدی سیل و سوات، ایڈونچر ٹورازم و ایلوتیکن بریرہ۔ اوپاکستانی سفیر ءِ انفراسٹرکچر ءِ گچین کننگ و سیل و سواتی تا آسراتی کن کروک آ چندی گام گیج آتیان ہم معلومدار کرے۔