لاہور۔ 31 جنوری (اے پی پی) لاہور نا انسداد دہشت گردی نا خصوصی عدالت 9 مئی نا واقعہ غاتیٹی پولیس تھانہ شادمان ءِ خاخر و جلاؤ گھیراؤ نا دوبہ ٹی درج مقدمہ ٹی پوسکن آ پندار دوبہ دار مسکوہی ایم این اے عالیہ حمزہ غان جاست وپاست نا موکل تس۔ انسدادِ دہشت گردی عدالت نا جج نوید اقبال پولیس نا درخواست آ سماعت کرے۔ چارشنبے نادے آ سماعت آ جاست وپاستی آفیسر عدالت اٹ درخواست جمع کرفے و خواست کرے کہ دوبہ دار عالیہ حمزہ غان شادمان تھانہ ءِ خاخر لگفنگ نا مقدمہ ٹی اوار جاست وپاست کننگ ءِ۔ دوبہ دار دُن تو کوٹ لکھپت زندان اٹی جوڈیشل ریمانڈآٹی ءِ ہندا سوب آن دوبہ دار آن زندان اٹی جاست وپاست نا موکل تننگے۔ عدالت جاست وپاستی آفیسر نا درخواست ءِ منظور کرسا پی ٹی آئی راہشون عالیہ حمزہ غان زندان اٹی جاست وپاست کننگ نا موکل تس۔
