اسلام آباد۔ 31 جنوری (اے پی پی) چیئرمین سینیٹ محمد صادق سنجرانی بلوچستان نا علاقہ مچھ و کولپور اٹی دہشت گرد آتا جلہو آتے پسپا کننگ آ سیکورٹی فورس آتے مبارکبادی تسنے۔ سینیٹ سیکرٹریٹ آن جاری بیان نا رداٹ چیئرمین سینیٹ پارے کہ پاکستان نا سیکورٹی فورس آک مسہ خودکش جلہو گیر آتون اوار 9 دہشت گرد آتے خلسا بلوچستان ءِ بھلو بھسکاری اسے آن بچفینو۔ چیئرمین سینیٹ مچھ و کولپور آ مروک آ جلہو آتیٹی سیکورٹی فورس آتا 4 ورنا و2 کودک شاری تا شہیدی آ اوفتا خاہوت آتون ہڑزخواہی و ہمدردی نا درشانی ءِ کرینے۔ چیئرمین سینیٹ محمد صادق سنجرانی پارے کہ کانود نافذ کروک آ ادارہ غاتا گچین ورندی دہشت گردی نا برخلاف جنگ اٹی اوفتا بے لوث و غیرمتزلزل عزم انا شاہدی ءِ۔ پاک فوج انا ورناک تینا جون تے دلدست آ تخسا ملک و قوم انا رکھ ءِ پک کننگ ءُ۔ اوپارے کہ ملک دشمن زموار آک تینا ناپاک عزم اٹی اسُل سرسہب مفسہ۔ محمد صادق سنجرانی مستی پارے کہ دہشت گردی نا واقعہ بلوچستان نا امن ءِ بھس کننگ نا سازش اسے۔ دہشت گرد آتے پاکستان نا امن ءِ بھس کننگ ا ٹ اسُل سرسہب مننگ کن الیپنہ۔ مچ آ قوم سلہہ بند فوج اتون ہم کوپہ سلوک ءِ۔ محمد صادق سنجرانی پارے کہ دہشت گردی نا برخلاف جنگ اٹی پاکستان نا سیکورٹی فورس و الس بے مٹ قربانی تسنو ہرازیان مفسہ۔ ڈپٹی چیئرمین سینیٹ مرزامحمد آفریدی، قائد ایوان سینیٹ سینیٹر محمد اسحاق ڈار و قائد حزب اختلاف سینیٹ سینیٹر ڈاکٹر شہزاد وسیم ئسک ہم بلوچستان نا علاقہ مچھ و کولپور اٹی دہشت گرد آتا جلہو آتے پسپا کننگ آ سیکورٹی فورس آتا کارکڑد نا ستاءِ کرینو۔ اوفک دا دہشت گردانہ جلہو آتا برخلاف برجاآپریشن اٹی اسہ ایلو آ سم کاری ٹی سیکورٹی فورس آتا 4 ورنا و 2 کودک شاری تا شہیدی آ اوفتا خاہوت آتون ہڑزخواہی و ہمدردی نا درشانی ءِ کرینو۔ اوفک پاریر کہ دہشت گرد آک مچ آانسانیت نا دشمن ءُ۔ پاکستان دہشت گردی نا ناسور ءِ چٹفنگ کن سنبرینگوک ءِ۔
