اسلام آباد۔ 31 جنوری (اے پی پی) نگران بنجائی وزیر داخلہ و صنعت ڈاکٹر گوہر اعجاز پارینے کہ کَمُند نا کشارگر آتا فائدہ غاتا رکھ ءِ کننگ ننا فرض ءِ، پدریسہ ارٹ میکو سال کمند نا ریکارڈ پیدوار گمانی ءِ۔ وزارت صنعت و پیدوار آن جاری بیان نا رداٹ داخیال آتا درشانی ءِ او تینا کماشی ٹی شوگر ایڈوائزری بورڈ انا دیوان اٹی کرے۔ دیوان اٹی نگران بنجائی وزیر نیشنل فوڈ سیکورٹی کوثر عبداللہ ملک، سیکرٹری صنعت و پیدوار راشد لنگڑیال ئسک بشخ ہلکر۔ دیوان اٹی بنجائی وزیر ڈاکٹر گوہر اعجاز ملک ا ٹی بورہ نا کوڑی تا جاچ ءِ ہلک۔ پاکستان شوگر مل ایسوسی ایشن پارےکہ وزیر گوہر اعجاز نا بورہ نا اسمگلنگ نا برخلاف کریک ڈاؤن نا ستاءِ کینہ۔ داوخت آ گوہر اعجاز پارے کہ کمند نا فصل انا پیدوار 65 لکھ ٹن اسکان مننگ نا گمان ءِ ہراناسوب آن پدریسہ ارٹ میکو سال کمند نا ریکارڈ پیدوار گمانی ءِ۔ اوپارےکہ ملک اٹی بورہ نا بھلو کوڑی اس ساڑی ءِ۔ شوگر انڈسٹری ٹی خراج دُزآتا برخلاف کارروائی کننگک۔ کمند ناکشارگر آتا فائدہ غاتا رکھ ءِ کننگ ننا فرض ءِ۔ اوپارے کہ ضرورت نا گڑاتا کم نرخ آتیا الس ءِ فراوانی حکومت نا اولیت آتیٹی اوار ءِ۔
