کراچی۔ 30 جنوری (اے پی پی) سندھ انا نگران وزیرداخلہ و جیل خانہ جات بریگیڈیئر (ر) حارث نواز تون یورپی یونین نا چار باسکی ڈل اوڑدہی کرے۔ سے شنبے نادے آجاری اعلامیہ نا رداٹ داوخت آ صوبائی سیکرٹری داخلہ اقبال میمن ہم ساڑی ئسک۔ ڈل گچین کاری 2024 نا بست وبند آتا بابت خصوصی وڑاٹ امن و ایمنی نا گام گیج و آجو، انصاف اٹ و شفاف گچین کاری تے پک کننگ کن انتظامی بست وبند آتیا سرجمی اٹ گپ وتران کرے۔ وزیرداخلہ ڈل ءِ رکھی گام گیج آتا بارواٹی حوال ترساپارے کہ الیکشن کمیشن ءِ شفاف وڑاٹ گچین کاری کرفنگ کن پورو کمک کننگ انگ ءِ۔ اووخت آ، آجو، انصاف اٹ و شفاف گچین کاری تا اڈتننگ ءِ پک کننگ نا حکومتی عزم انا درشانی ءِ کرسا پارے کہ نگران سیٹ اپ پورو وڑاٹ بے کنڈ ہلوک مریک۔ اومستی پارے کہ ووٹرو الیکشن تیٹی بشخ ہلوک آ اومیتدار آتے پورو رکھ فراوان کننگ نگران حکومت نا آئینی زمواری ءِ و حکومت دا مسخت کن جوان وڑاٹ گام گیج کننگ اٹی ءِ۔ یورپی یونین نا ڈل مثبت وڑاٹ اومیت ظاہر کرے کہ نگران حکومت، ای سی پی آئین پاکستان نا رداٹ آجو و انصاف اٹ گچین کاری کرفنگ اٹ سرسہب مریک۔
