پشاور۔ 30 جنوری (اے پی پی) الیکشن کمیشن نا کنڈآن ضابطہ اخلاق خلاف ورزی کننگ آ چندی اومیتدار آتیا 9 لکھ 66 ہزار روپئی جرمانہ بیٹ کننگا۔ الیکشن کمیشن خیبرپختونخوا نا کنڈآن جاری مروک آ اعلامیہ نا رداٹ پشاور ڈویژن اٹی جم وڑاٹ 95 ہزار مالاکنڈ ڈویژن اٹی 3 لکھ، ہزارہ ڈویژن اٹی 1 لکھ 71 ہزار روپئی جرمانہ خلنگا۔ ضابطہ اخلاق خلاف ورزی کننگ آ مردان ڈویژن اٹی اومیتدار آتیا 1 لکھ 5 ہزار روپئی، کوہاٹ اٹی 1 لکھ 15 ہزار روپئی، بنوں ٹی 30 ہزار ، ڈی آئی خان اٹی 1 لکھ 50 ہزار نا جرمانہ اومیتدارآتیا خلنگا۔ داکان بیدس خیبرپختونخوا ٹی ضابطہ اخلاق نا خلاف ورزی آ ڈسٹرکٹ مانیٹرنگ آفیسرآتا کارروائی برجاءِ۔ ڈسٹرکٹ مانیٹرنگ آفیسر باجوڑ کارروائی کرسا حلقہ این اے 8 و پی کے20 انا اومیتدار سید اخوانزادہ چٹان آ 10 ہزار روپئی جرمانہ بیٹ کننگانے، اومیتدار نا نمائندہ ڈسٹرکٹ مانیٹرنگ آفیسر نا دفتراٹی پیش مس، وضاحت است ج مفننگ گوندسا جرمانہ کننگا۔ ہنداوڑ حلقہ این اے 39 بنوں آن آجو اومیتدار نسیم علی شاہ آ 10 ہزار روپئی جرمانہ عائد کننگانے، جرمانہ ءِ 3 دے انا تہہ ٹی قومی خزانہ ٹی جمع کننگ نا پارت کننگانے، اومیتدار نا نمائندہ ڈسٹرکٹ مانیٹرنگ آفیسر نادفتراٹی پیش مس، وضاحت غیرتسلی بخش گوندسا جرمانہ بیٹ کننگا۔ ڈسٹرکٹ مانیٹرنگ آفیسر ڈی آئی خان کارروائی کرسا عزیزاللہ علیزئی آ 50 ہزار روپئی جرمانہ بیٹ کرینے، او ڈسٹرکٹ مانیٹرنگ آفیسر ڈی آئی خان نا دفتراٹی پیش مس ولے وضاحت غیر تسلی بخش گوندسا جرمانہ بیٹ کننگا۔ ہندا وڑ کفیل نظامی آ 50 ہزار روپئی جرمانہ بیٹ کننگانے، اونا وکیل پیش مس ولے اونا وضاحت غیر تسلی بخش گوندسا جرمانہ بیٹ کننگا، ہندا وڑ جنید احمد نا برخلاف اسہ کنڈی کارروائی کرسا 50 ہزار روپئی جرمانہ بیٹ کننگا۔ او وضاحت کن پیش متو، ہندا وڑ اومیتدار پی کے 113 ڈی آئی خان عمران جاوید عرف سہیل راجپوت واحمد کریم کنڈی وخت اس کہ اومیتدار این اے 45 ڈی آئی خان یعقوب شیخ و میئر سٹی کونسل عمرامین خان ءِ نوٹس جاری کننگانے ہرافتے وضاحت کن ڈسٹرکٹ مانیٹرنگ آفیسر ڈی آئی خان نا دفتراٹی سہ شنبے نادے 12 بجہ غا بٹنگانے۔
