کوئٹہ۔ 30 جنوری (اے پی پی)بلوچستان اسمبلی نا حلقہ پی بی 42 کوئٹہ 5 آن آجو اومیتدار مدثر صدیق پارینےکہ حلقہ نا الس ءِ مون تروک ویل آتا ایسری و الس نا بے لوث خذمت نا جوزہ نا رداٹ 8 فروری آ مروک آ گچین کاری تیٹی بشخ ہلنگ اٹی اُٹ مخالف آک ننا مقبولیت آن خوفزدہ مرسا کنا گچین کاری تا دزکش مننگ نا دروغ نا ہوکا تالان کننگ ءُ الس است جم مرے نن گچین کاری تیان ہچ ءُ حالیت اسے ٹی دزکش مفنہ۔ داہیت ءِ او سے شنبے نادے آ فقیر محمد روڈ، گلبرگ اسٹریٹ اٹی آفتاب نا ہنکین آ اڈ ہلوک کارنر میٹنگ آن تران کرساپارے۔ حاجی مدثر صدیق پارے کہ نن الس نا مون آ تینا منشور ءِ پیش کرینن ہراٹی علاقہ ٹی دیر انا ویل انا ایسری، علاقہ ٹی انفراسٹرکچر نا بحالی ، سفائی نا حالیت آتے گچین کننگ، مسیت و مدرسہ غاتیکن خصوصی فنڈ انا ٹہیفنگ، علاقہ ٹی ورناتیکن گوازی تا مون آ دننگ کن گام گیج، چوری جنوزان و نادار بندغ آتیکن خصوصی فنڈ انا جاری کننگ، زالبول و چناتیکن ٹیکنیکل سینٹر و ورناتیکن بڑزکو تعلیم و روزگار نا فراوانی اوار ءِ الس اگہ ننے سرسہبی اٹ ہمکنار کرے تو اوفتے مایوس کپنہ۔ اوپارے کہ مستین اٹ علاقہ غان گچین مروک آ نمائندہ غاتے حلقہ نا شونداری کن ارب آ روپئی نا فنڈ ملا ہرا کرپشن نا گواچی مسر ہرانا سوب آن الس بنداوی آسراتی تیان محروم ءُ ، الس وونٹ انا کمک اٹ ہمو بندغ آتے مسترد کے ہرافک مستین اٹ الس نا ہچ ءُ خذمت اس کتنو۔ اوپارےکہ مخالف آک ننا ودوک آ مقبولیت آن خوفزدہ مرسا ننا گچین کاری تیان دزکش مننگ نا دروغ انا ہوکاتالان کننگ ءُ ہرانا حقیقت تون ہچ ءُ تعلق اس اف، نن پیدوار کننگ خوانہ کہ ہر حال اٹ 8 فروری آ مروک آ گچین کاری تیٹی بشخ ہلینہ۔ اوپارے کہ الس 8 فروری آ ننا گچین کاری نشان ’’ماچس‘‘ آ مہر خلسا سرسہب کیر انشاء اللہ اوفتے مایوس کپنہ۔
