آئین نا رداٹ فوجداری نظام انصاف اٹی پین اصلاحات کن کانود سازی نا اختیاربیرہ پارلیمان نا ءِ، نگران وزیراعظم انوارالحق کاکڑ

اسلام آباد۔ 30 جنوری (اے پی پی) نگران وزیراعظم انوارالحق کاکڑ پارینے کہ آئین نا رداٹ فوجداری نظام انصاف اٹی پین اصلاحات کن کانود سازی نا اختیار بیر ہ پارلیمان نا ءِ۔ نجی ٹی وی چینلز اسہ نیوز اسے نا مارننگ شواٹی گپ وتران کرسا اوپارے کہ ساڑی فوجداری نظام انصاف نا رداٹ سزا تا کچ بے کچ کم ءِ ہرا خامی تے ظاہر کیک و گچین کانود سازی نا کمک اٹ دا خامی تے مرکننگ کن کوشست کننگ مریک۔ بلوچستان اٹی دہشت گرد ٹولی تا ساڑی گری نا بابت اسہ سوج اسے نا ورندی ٹی اوپارے کہ نان اسٹیٹ ایکٹرآتے بیدادی نا حق اف و ریاست نا دا زمواری ءِ کہ او داوڑنا دہشت گرد زموار آتے چٹفر۔ اوپارے کہ ملک اٹی 90 ہزار بندغ دہشت گردی نا شست مسر۔ داسیاسی جماعت و پارلیمنٹرینز نا زمواری  ءِ کہ او فوجداری نظام انصاف ءِ گچین کننگ کن تینا زمواری تے پورو کیر۔ او دا باندات ءِ ہرفسا کرینے۔ اوپارے کہ بلوچستان اٹی پشتون، بلوچ و چندی آبادکار کیہی دہائی تیان رہینگ انگ ءُ۔ امریکہ، برطانیہ ، یورپی یونین و غٹ ایلو جمہوری ملک آک داوڑناگروپ آتے دہشت گرد گوندانو۔ نگران وزیراعظم پارے کہ کناخڑک آ کالعدم ٹی ٹی پی، احرار و بی ایل اے یا بی ایل ایف نا نیام اٹ ہچ ءُ پرخ اس اف۔ دادہشت گرد گروپ بیدادی ءِ دہشت تالان کننگ و کودک مخلوق نا خون اکن اسہ سلہہ سے نا وڑاٹ کاریم اٹ اتیرہ۔ اوفتا دہشت گرد جلہو آتیٹی 2018 آن داتم اسکان صوبہ ٹی 1038 بندغ شہید مسنو۔ کوسٹل ہائی وے و تربت پولیس اسٹیشن آ جلہو آتیٹی کودک مخلوق خلنگار و زندہ ہشنگار۔ ایلو کنڈآ سیاسی برانز و سوچ ءِ دنیا میڈیا و اہل دانش نا کنڈآن ستا کننگک۔ دنیا آئی ایس آئی ایس ءِ اسہ دہشت گرد تنظیم اس گوندانے۔ اسہ سوج اسے نا ورندی ٹی انوارالحق کاکڑ پارے کہ دے ٹک نیامی اسہ پیچیدہ چیلنج اسے۔ پاکستان دنیا نا چندی فورم تیا جہانی برادری ءِ دا پارینے کہ غزہ ناحالیت آتیٹی تسلسل ءِ منپنہ۔ دمدستی سیزفائر اتون اوار اوار زہمی تیکن انسانی کمکی راہداری ملنگ المی ءِ۔ دامسلم ملک آتون پاکستان نا اسیجائی موقف ءِ۔ اوپارے کہ اسلامی ملک آتا تنظیم، عرب لیگ و غٹ دنیا جون 1967 آن مست انا سیم تیا تالان اِرا ریاستی ایسری ہراٹی القدس شریف نا دارالحکومت اتون آجو فلسطین مرے، نا ہیت ءِ کیک، ہندا مسلم دنیا نا ہم امنائی موقف ءِ۔ اوچندی زموار آتا کنڈآن اوڑا تنقید آ ناپسندیدگی نا درشانی ءِ کرسا پارے کہ پاکستان فلسطین آ تینا اصولی موقف آن دزکش مفک۔