اسلام آباد۔ 29 جنوری (اے پی پی) نگران بنجائی وزیر داخلہ ڈاکٹر گوہر اعجاز پارینے کہ بنجائی دارالحکومت نا 13 تھانہ غاتا تزئین و آرائش نا بناءِ کننگانے، 30دے اٹی اسلام آباد نا دا تھانہ اسٹیٹ آف دی آرٹ جوڑمریک، الس نا جان و مال انا رکھ، امن و ایمنی ءِ پک کننگ تون اواراوار پولیس نا شناخت ءِ ہم گچین کننگ آ چکار کننگانے، اسلام آباد نا ہسپتال آتے مثالی جوڑ کننگ نا ایجنڈاغا عمل کننگ ءِ اسلا م آباد نا الس ءِ ہمو آسراتی و آسانی تے ایتنہ ہرافتا او حقدار ءُ ۔ او دوشنبے نادے آ تھانہ گولڑہ نا ماڑی نا بنداونا دود آن تران کریکہ۔ آئی جی اسلام آباد پولیس ڈاکٹر اکبر ناصر خان، ڈی آئی جی، ایس ایس پیز تون اوار ایلو بڑزکوپولیس آفیسر ، انجمن تاجران نا نمائندہ و شرفمند آ علاقہ ہم داوخت آ ساڑی ئسر۔ نگران بنجائی وزیرداخلہ ڈاکٹر گوہر اعجاز پارے کہ وزیراعظم کنےوزارت داخلہ ناامانتءِ تسنے تو اولیکو دے آئی جی پولیس و کمشنر اسلام آباد تون اوڑدہی کرسا اوفتیان ویل آتے اَرفیٹ۔ پولیس کمامدارآتیان ارفیٹ کہ تینا فورس ءِ انت آسراتی فراوان کننگانے و امر اوفتا حالیت آتے گچین کننگ مریک۔ آئی جی اسلام آباد پارے کہ اسلام آباد نا 26 تھانہ غاتیان 13 تھانہ غاتا حالیت ہندن ءِ کہ نےبطو روزیرداخلہ دورہ ءِ ہم کرفنگ کپرہ۔ نگران وزیر داخلہ ڈاکٹر گوہر اعجاز پارے کہ دا حالیت آتیا سیکرٹری داخلہ و ایلو کمامدارآتے پارت کرین کہ اسلام آباد نا ہمو تھانہ غاتا دمدستی تزئین وآرائش ءِ کننگے اوکان پد اینو دوشنبے آن اسلام آباد نا 13 تھانہ غاتیٹی تزئین و آرائش نا کاریم بناکیک۔
