چیئرمین سینیٹ نا سینئر صحافی پرویز شوکت نا کزیت آ است ہسونی نا درشان

اسلام آباد۔ 26 جنوری (اے پی پی) چیئرمین سینیٹ محمد صادق سنجرانی ہڑدے ئی جنگ انا سینئر صحافی و پاکستان فیڈرل یونین آف جرنلسٹس ورکرز نا صدر پرویز شوکت نا کزیت آ ڈکھیائی و است ہسونی نا درشانی ءِ کرے۔ جمعہ نادے آ سینیٹ سیکرٹریٹ آن جاری بیان نا رداٹ چیئرمین سینیٹ دعاکرے کہ اللہ تعالیٰ ایماندار نا بخشش و درجہ غاتے بڑز کے و خاہوت ءِ دا صدمہ ءِ صبر و حوصلہ اٹ سگنگ نا توفیق عطاکے۔ چیئرمین سینیٹ محمد صادق سنجرانی پارے کہ سینئر صحافی پرویز شوکت کہنہ مشق صحافی اس ئس۔ او صحافت نا بشخ اٹی نمان خذمت سرتسنے۔ چیئرمین سینیٹ پارے کہ ایماندار نا صحافت نا بشخ اٹی خذمت آتے تادیر یات تخنگک او اسہ قابل ءُ صحافی اس ئس۔ اوپارے کہ ایماندار صحافی برادری و میڈیاورکرآتا راجی آسودہی کن سخت جہد کرے ہرافتے اسُل است آن دننگ مفک۔ ڈپٹی چیئرمین سینیٹ سینیٹر مرزامحمد آفریدی، قائد ایوان سینیٹ سینیٹر اسحاق ڈار، قائد حزب اختلاف سینیٹ سینیٹر ڈاکٹر شہزاد وسیم ئسک ہم ہڑدے ئی جنگ انا سینئر صحافی وپاکستان فیڈرل یونین آف جرنلسٹس ورکرز نا صدر پرویز شوکت نا کزیت آ ہڑزخواہی نا درشانی ءِ کرسا تینا جتا جتا ہڑزخواہی کلہو آتیٹی ایماندار نا بخشش و درجہ غاتا بڑزی کن دعاکریر۔