نیویارک۔ 26 جنوری (اے پی پی) پاکستان و کریبین ملک سینٹ کٹس اینڈ نیوس باضابطہ وڑاٹ سفارتی تعلقداری قائم کریر۔ داچرجوئی ٹی نیویارک اٹی اقوام متحدہ ٹی پاکستانی مشن اٹی تدوک آدے اڈ ہلوک دود اٹی اقوام متحدہ ٹی پاکستان نا آخبتی نمائندہ منیر اکرم و اونا سینٹ کٹس اینڈ نیوس نا ہم منصب ڈاکٹر مٹریس ولیمز تینا ملک آتا نیام اٹ سفارتی تعلقداری تے باضابطہ کننگ کن اسیجائی اعلامیہ غا دستخط کریر۔ سینٹ کٹس اینڈ نیوس 1983 ٹی آجوئی دوئی کرے، ہرا بحراوقیانوس و بحیرہ کیریبین نا نیام اٹی ءِ۔ داوخت آ پاکستانی مندوب منیر اکرم پارے کہ ہڑتوم آ ملک آتا نیام اٹ سفارتی تعلقداری نا باضابطہ جوڑ مننگ آن فنانس، واپار، زرکاری و انفارمیشن ٹیکنالوجی کون آ چندی بشخ آتیٹی کمکاری نا کسرآک ملنگرہ۔ اوپارےکہ داڑآن ہڑتوم آملک آتا نمائندہ غاتے چندی کہول آتیا خڑکی و بامعنی گپ وتران نا موقع فراوان مریک، ہرانا مسخت اسہ ایلو نا آزموندہ غاتیان فائدہ ہرفنگ ءِ۔ اوپارے کہ او سینٹ کٹس اینڈ نیوس نا آخبتی مشن تون ہڑتوم آکنڈآتا و کثیر جہتی فورم تیا اسیجائی است خواہی نا بشخ آتیٹی پوسکن آ شریداری نا چاری ءِ۔ داوخت آ سینٹ کٹس اینڈ نیوس نا سفیر ڈاکٹر مٹریس ولیمز دود انا مہمانداری آ پاکستانی مشن نا منت واری ءِ ہرفے۔ اوپارے کہ ہڑتوم آملک آک شاید دنیا نا جتا جتا کونہ غا واقع مریر ولے اوفتا نیام اٹ اسہ ایلو کن تین پہ تینی شرف و خیرخواہی مسنے۔ اوپارے کہ پاکستان و سینٹ کٹس اینڈ نیوس نا نیام اٹ سفارتی تعلقداری نا باقاعدہ قیام چندی بشخ خاص وڑاٹ واپار، سیل و سوات و تعلیم نا بشخ اٹی کمکاری نا سوب جوڑ مریک۔
