اسلام آباد۔ 26 جنوری (اے پی پی) نگران بنجائی وزیر خزانہ و محصولات ڈاکٹر شمشاد اختر پارینے کہ پائیدار اقتصادی شونداری و نمو کن گام گیج آتا چرجوئی برجاءِ، اسمگلنگ ، منی لانڈرنگ و خراج دُزی آن ملکی زرگزران بھاز بے وڑ زہمی مننگ ءِ۔ داخیال آتا درشانی ءِ او کسٹم نا جہانی دے انا وخت آ اڈ ہلوک دود آن تران کرساکرے۔ ڈاکٹر شمشاد اخترپارے کہ ملکی زرگزران نا شونداری و نمو کن پدریسہ کاریم برجاءِ۔ جی ڈی پی نا کچ آن خراج آتا کچ اٹی ودکی المی ءِ۔ دا وخت آ ملک اٹی جی ڈی پی نا کچ آن خراج آتا کچ 8 آن 9 درسد ءِ ہراٹی ودکی المی ءِ۔ اوپارے کہ اصلاحات نا عمل اٹی ڈیوٹی و ایس آراو ءِ کم کننگ نا سفارش کننگک۔ بارڈر ٹریڈ نا بابت کسٹم اصلاحات اسہ مشکل ءُ ریسہ سے۔ وزیرخزانہ پارے کہ ایف بی آر اٹی اصلاحات کن تدوک آ5 تُو سلابت نا عمل برجاءِ۔ ایف بی آر باسک آتا سلاہ ءِ ہم ہلنگانے و چیئرمین ایف بی آر ہم آن بورڈ ءِ۔ ایف بی آر اصلاحات کن گڑاس اسکیم ہم پیش کرینے۔ اوپارے کہ ایف بی آر برجامالی سال اٹی 9.4 ٹریلین روپئی محصولات نا ہدف دوئی کیک۔ ایف بی آر نا ریونیو ٹی ودکی مننگ ءِ۔ ریونیو نا دوءی کننگ و اوٹی ودکی کن گام گیج آتا چرجوئی ءِ برجاتخوئی مریک و دامسخت کن آگاہی مہم ہم المی ءِ۔ وزیرخزانہ پارے کہ قوم انا زرگزرانی و راجی شونداری کن ریونیو ٹی ودکی المی ءِ۔ داڑکن غٹ شریدار آک تینا کڑد ءِ ادا کیر۔ دود آن بنجائی وزیر مواصلات شاہد اشرف تارڑ ہم تران کرے۔
