پاکستان پیپلزپارٹی نا پنی مننگ آن ننا مخالف آک خوفزدہ ءُ، پاکستان پیپلزپارٹی نا پندار اومیتدار قومی اسمبلی حلقہ این اے 262 حاجی محمد رمضان اچکزئی

کوئٹہ۔ 25 جنوری (اے پی پی) پاکستان پیپلزپارٹی نا پندار اومیتدار قومی اسمبلی حلقہ این اے 262 حاجی محمد رمضان اچکزئی، صوبائی راہشون انجینئر ہادی عسکری، حیات خان اچکزئی و ایلوفتا کماشی ٹی پنچ شنبے نادے آ  گچین کاری مہم نا چرجوئی ٹی ہزارہ ٹاؤن اٹی موٹرسائیکل ریلی اس کشنگا ہرا چندی شاہراہ تیان مرسا گچین کاری دفترآ سرمرسا ایسر مس۔ ریلی ٹی بشخ ہلوک آتیان تران کرسا حاجی محمد رمضان اچکزئی ، انجینئر ہادی عسکری و حیات خان اچکزئی پارے کہ پاکستان پیپلزپارٹی نا چیئرمین بلاول بھٹو زرداری تون الس نا خذمت نا ویژن ءِ پاکستان پیپلزپارٹی نا پنی مننگ آن ننا مخالف آک خوفزدہ ءُ، پیپلزپارٹی اسٹ انگا السی جماعت ءِ ہرا ملک و ملت ءِ مون تروک گھمبیر حالیت و زرگزرانی گرداب آن کشنگ نا لائخی تخک شہید گودی بینظیر بسوسس روزگار ایسوسس داسہ بلاول بریک روزگار اتیک السی نعرہ جوڑ مسنے۔ اوپارے کہ بلاول بھٹو زرداری نا تاریخی جلسہ 8 فروری گچین کاری تیٹی پیپلزپارٹی تاریخی سرسہبی نا نوید ءِ۔ اوپارے کہ بلاول بھٹو زرداری نا مقابلہ اشرافیہ ءِ ریلیف و الس ءِ تکلیف تروک آتون ءِ، پاکستان نا شونداری و شونہالی نا السی زرگزرانی معاہدہ پیپلزپارٹی نا السی منشور پروگرام و پالیسی نا مجموعہ ءِ۔ اوپارےکہ فرزند بے نظیر بلاول بھٹو زرداری منشور اٹی بینظیر انکم سپورٹ پروگرام و بین ءِ چٹفنگ بے نظیر ڈٹ اوار کرینے۔ اوپارے کہ 3 سد یونٹ اسکان مفت بجلی 30 لکھ اُراتننگ، بزغرکارڈ، مزور کارڈ و یوتھ کارڈ انا جاری کننگ مستین آنبار السی خذمت نا خذمت گار پروگرام ءِ۔ اوپارے کہ انشاء اللہ 8 فروری آ الس پاکستان پیپلزپارٹی نا اومیتدار آتا گچین کاری نشان ’’تیر‘‘ آ مہر خلسا اوفتے سرسہب کیرہ و بلاول بھٹو زرداری ملک انا وزیراعظم و جیالہ وزیراعلیٰ مریک۔