پاکستان امریکی زرکارآتیکن پرکشش و فائدہ ئی ءُ جاگہ سے، پاکستانی سفیر مسعود خان

واشنگٹن۔ 25 جنوری (اے پی پی) امریکہ ٹی پاکستان نا سفیر مسعود خان پارینے کہ پاکستان امریکی زرکارآتیکن غٹ آن پرکشش ءُ جاگہ سے ہنداسوب آن امریکی زرکارآک پاکستان نا گچین کاروباری چاگڑدآن فائدہ ہرفر۔ پاکستانی سفارت خانہ نا کنڈآن جاری پریس ریلیز نا رداٹ اوتدوک آ دے پاکستان چیمبرآف کامرس یوایس اے نا صدر عامر پیرانی و اونا ٹیم اتون اسہ ورچوئل اوڑدہی سے ٹی پارے کہ خصوصی زرکاری سہولت کونسل ( ایس آئی ایف سی ) پاکستان و ڈیہہ انا اسہ بھلا مارکیٹ آن فائدہ ہرفنگ کن زرکارآتے ہرممکن آسراتی و ون ونڈو ایسری اس فراوان کیک۔ داوخت آ ہیوسٹن اٹی پاکستان نا قونصل جنرل آفتاب احمد چوہدری و ٹریڈ اینڈ انویسمنٹ اتاشی شائستہ بنیاد ہم ساڑی ئسر۔ پاکستانی سفیر پارے کہ آئی ٹی، توانائی، کشت وکشار و معدنیات ننا اولیتی بشخ آک ءُ، ولے نن تینا زرگزران نا غٹ بشخ آتیٹی زرکاری نا آسراتی فراوان کینہ۔ اوپارے کہ ایس آئی ایف سی نا جوڑ کننگ داہیت ءِ پک کننگ کن کننگانے کہ درملکی زرکار، خاص وڑاٹ پاک امریکی پوریاگر برادری،  ہرا تینا لمہ وطن اٹی زرکاری کننگ خوارہ، ءِ اوفتا کاروباری مسخت آتیٹی جوان وڑاٹ آسراتی فراوان کننگے۔ عامرپیرانی پاکستانی سفیر مسعود خان ءِ پی سی سی ۔ یوایس اے نا سرجز، خاص وڑاٹ پاکستان بزنس ایکسپو نا بارواٹی پارے ہرا اکتوبر اٹی ٹیکساس نا شار ہیوسٹن اٹ اڈہلیک، ہراٹی چندی بشخ آتیٹی پاکستانی مصنوعات نا نمائش کننگک۔ ہرافتے ٹی گوازی و سرجیکل، آئی ٹی، زیبائی و جان جوڑی، خور و شربت، تیل وگیس، اُرائی کاریم اٹ اتوک آ گڑا و ٹیکسٹائل و پاکستانی زیورآک اوار ءُ۔ پاکستانی سفیر نمائش نا اڈتننگ اٹ سفارت خانہ و پاکستانی قونصلیٹ نا کنڈآن ہرممکن آسراتی فراوان کننگ نا باوری کرفے۔