برن۔ 25 جنوری (اے پی پی) پاکستان و سوئٹزرلینڈ تین پہ تینی تعلقداری ءِ سوگو کننگ کن ہڑتوم آ کنڈآتا سیاسی سلابت نا اہمیت نا درشانی ءِ کرسا تین پہ تینی است خواہی نا غٹ امور آتیٹی کمکاری ءِ برجاتخنگ آ امنا کرینو۔ دا امنائی سلاہ پاکستان سوئٹزر لینڈ ہڑتوم آ کنڈآتا سیاسی سلابت اٹ طے مس ہرانا 12 می دور 24 جنوری 2024 آ برن اٹی اڈ ہلک۔ ایڈیشنل سیکرٹری خارجہ (یورپ) ایمبیسیڈر شفقت علی خان پاکستانی ڈل انا کماشی ءِ کرے، وخت اس کہ سوئٹزر لینڈ نا کنڈآن اسسٹنٹ سیکرٹری آف سٹیٹ ایشیاو بحرالکاہل ، فیڈرل ڈیپارٹمنٹ آف فارن افیئرز ایمبیسیڈر ہینرک شیلن برگ تینا ڈل انا کماشی ءِ کرے۔ ترجمان دفترخارجہ نا رداٹ ہڑتوم آ فریق آک ہڑتوم آکنڈآتا سیاسی تعلقداری نا غٹ پلو و واپار و زرکاری ، سلامتی و نقل مکانی ٹی کمکاری آ گپ وتران کریر۔ داوخت آ علاقائی حرکیات و کثیر الجہتی امور آہم گپ وتران کننگا۔ اوپاکستان سوئٹزر لینڈ تعلقداری ءِ سوگو کننگ کن ہڑتوم آ کنڈآتا سیاسی سلابت نا اہمیت نا درشانی ءِ کریر۔ و تین پہ تینی است خواہی نا غٹ امور تیٹی کمکار یءِ برجاتخنگ آ امنا کریر۔ برن اٹی ایڈیشنل سیکرٹری خارجہ سٹیٹ سیکرٹری خارجہ امور ایمبیسیڈر الیگزینڈر فاسل تون ہم اوڑدہی کرے و پاکستان سوئٹزر لینڈ ہڑتوم آ کنڈآتا تعلقداری تے پین سوگو کننگ بشمول چاگڑدی بدلی، انسانی حق و شونداری کمکاری نا بشخ آتیٹی گپ وتران کریر۔
