سی پیک نا رداٹ 29 ارب ڈالر نا 36 ڈٹ پورو و 22 آ کاریم برجاءِ، چین 40 ملین بندغ ءِ نیزگاری آن کشسا اوفتا زند آ مثبت اثرمرتب کرے، محمد ضمیر اسدی

اسلام آباد۔ 25 جنوری (اے پی پی) پاکستان نا سیاسی جاچکار و چائنا انٹرنیشنل پریس کمیونیکیشن سینٹر نا ریسرچ فیلو محمد ضمیر اسدی پارینے کہ چین پاکستان اقتصادی راہداری (سی پیک) 21 می صدی نا اہم شونداری و سفارتی گام ءِ، دانا رداٹ 29 ارب ڈالر نا 36 ڈٹ پورو مسنو وخت اس کہ 22 آ کاریم برجاءِ، چین جہانی کہول آ 3000 بیلٹ اینڈ روڈ انیشی ایٹیو (بی آرآئی) ڈٹ آتیٹی اسہ ٹریلین ڈالر آن زیات نا زرکاری کرینے و 40 ملین آن زیات مخلوق ءِنیزگاری آن کشسا اوفتا زند آ مثبت اثر مرتب کرینے۔ داخیال آتا درشانی ءِ او پنچ شنبے نادے آ اے پی پی ءِ انٹرویو ٹی کرے۔ اوپارے کہ 2023 نا ایسر اسکان سی پیک نا فریم ورک انا رداٹ جم وڑاٹ 29 ارب ڈالر نا 36 ڈٹ پورو مسنو و 22 ڈٹ آتیاکاریم برجاءِ، ہرافتا مثبت نتیجہ بننگ داسکان سلوک ءِ۔ اوہڑتوم آ ملک آتا نیام اٹ کمکاری نا ساڑی آ بشخ آتا خاکہ اس پیش کرساپارے کہ ایم ایل ون نا اپ گریڈیشن ، خصوصی اقتصادی زون و کشت وکشار نا شونداری نمان اہمیت تخک۔ اونا پاننگ ئس کہ مسٹ میکو فریق نا سی پیک زرکاری ٹی است خواہی اٹ دا ڈٹ انا اہمیت اٹ ودکی مریک، پاکستان و چین مسٹ میکو فریق نا اوار مننگ نابارواٹی گپ وتران کننگ ءُ، یعنی بھاز انگا درملکی ادارہ و حکومت آک دا اقتصادی راہداری ٹی اوار مننگ نا درخواست کرینو۔ دا ڈٹ انا پبی فائدہ پاکستان نا راجی اقتصادی منظرنامہ ءِ بدل کرینے و مون نا ریسہ ٹی بھاز انگا گڑامون آ بریک۔ ضمیر اسدی پارے کہ سی پیک پاکستان و ڈیہہ انا راجی اقتصادی شونداری کن پوسکن ءُ محرک اس مریک، کنا خیال اٹ سی پیک آجو راہداری اسے و ہڑتوم آملک آک مسٹ میکو فریق نا شمولیت نا خیرمقدم ءِ کیرہ۔