کوئٹہ۔ 25 جنوری (اے پی پی) نگران وزیراعلیٰ بلوچستان میر علی مردان خان ڈومکی ناکماشی ٹی گوادر، اورماڑہ، پسنی و جیونی تون اوار نواحی علاقہ غاتیٹی دیر انا فراوانی نا بارواٹی دیوان اس اڈہلک ہراٹی نگران وزیرداخلہ میر زبیرخان جمالی، چیف سیکرٹری بلوچستان شکیل قادر خان، پرنسپل سیکرٹری ٹوسی ایم راشد رزاق خان، کمشنر مکران ڈویژن سعید احمد عمرانی، ڈپٹی کمشنر میجر ریٹائرڈ اورنگزیب بادینی تون اوار جی ڈی اے و رتعلقدار کمامدارآک بشخ ہلکر۔ دیوان اٹی ضلع گوادراٹی دیر انا فراوانی نا بابت برجاچندی ڈٹ آتیا حوال تننگا و پیش رفت نا جاچ ءِ ہلنگا۔ دیوان اٹی نگران وزیراعلیٰ بلوچستان پارے کہ گوادر اٹی کنوئی آ ساف دِیرانا فراوانی ءِ پک کننگک۔ کنوئی آ ساف دیر انا فراوانی نا بابت الس ءِ مون تروک ویل آتا پائیدار ایسر اس پٹنگ اُن گڑاس ڈٹ آتیٹی بے گرج تاخیر کننگا ہرا گڑتی نا سوب ءُ۔ اوتعلقدار کمامدارآتے پارت کرے کہ گوادر و گردونواح ٹی فراوانی آب نا زیرالتواء غٹ ڈٹ آتیاکاریم ءِ بلاتاخیر شروع کننگے و اوفتے زوت ایسر اسکان سرکننگے۔ کیسکو و کنٹریکٹر نا واجب الادا بل آتا ادائیگی ءِ کرسا سروسز بحال کننگے۔ داکان مست ڈپٹی کمشنر آفس گوادر آ سرمننگ آ پولیس نا چاک و چوبند دستہ نگران وزیراعلیٰ بلوچستان ءِ گارڈ آف آنر پیش کرے۔ نگران وزیراعلیٰ ڈپٹی کمشنر آفس گوادر اٹی جوڑ غاوسیل انا ہم معائنہ ءِ کرے و السی غاوتا درج و ازالہ کن وڑوڈول نا بابت معلومداری ہلک۔ اوپارت کرے کہ السی غاوتا ایسری کن جوان ءُ میکنزم اس جوڑ کننگے تانکہ لس بندغ ءِ ریلیف فراوان کننگ مرے۔
