نگران وزیراعظم تون سعودی الجومیہ گروپ نا ڈل انا اوڑدہی

اسلام آباد۔ 25 جنوری (اے پی پی) نگران وزیراعظم انوارالحق کاکڑ پارینے کہ پاکستان نا توانائی نا بشخ اٹی سعودی عرب نا زرکاری نا خیرمقدم ءِ کینہ، کراچی الیکٹرک نا کنڈآن گیگ بدل توانائی نا بشخ اٹی زرکاری نا حکمت عملی ستاکڑزک ہراڑآن صارف آتیکن بجلی نا ٹیرف ءِ کم کننگ اٹ کمک رسینگک۔ پنچ شنبے نادے آ وزیراعظم آفس نا میڈیا ونگ آن جاری بیان نا رداٹ نگران وزیراعظم انوارالحق کاکڑ تون سعودی عرب نا الجومیہ گروپ نا سروک شیخ عبدالعزیز حماد الجومیہ نا کماشی ٹی چار باسکی ڈل اوڑدہی کرے۔ داوخت آ نگران بنجائی وزیر خزانہ ڈاکٹر شمشاد اختر و نگران بنجائی وزیر توانائی محمد علی و تعلقدار بڑزکو سرکاری آفیسر آک ہم ساڑی ئسر۔ الجومیہ گروپ کراچی الیکٹرک اٹی بھلو کچ اسے آ زرکاری کرینے۔ نگران وزیراعظم ڈل اتون گپ وتران کرساپارے کہ پاکستان و سعودی عرب نانیام اٹ دیرینہ برادرانہ تعلقداری ءِ ہراوخت اتون پین سوگو مننگ ءِ، پاکستان اٹ سعودی عرب نا زرکاری ءِ قدر انا نظر اٹ ہرنہ، پاکستان نا توانائی نا بشخ اٹی سعودی زرکاری نا ستاءِ کینہ۔ اوپارے کہ کراچی الیکٹرک نا کنڈآن گیگ بدل توانائی نا بشخ اٹی زرکاری نا حکمت عملی ستاکڑزک ہراڑآن صارف آتیکن بجلی نا ٹیرف ءِ کم کننگ اٹ کمک رسینگک۔ اواومیت ظاہر کرے کہ اُرائی و صنعتی صارف آتے بے سلنگ آن بجلی نا فراوانی نا بابت کراچی الیکٹرک تینا انفراسٹرکچر اٹ پین گچینی اتیک۔ وزیراعظم الجومیہ گروپ ءِ پاکستان اٹ گیگ بدل توانائی نا بشخ اٹی زرکاری نا ترغیب تس۔ الجومیہ گروپ نا ڈل کراچی الیکٹرک نا متکن آ ویل آتے ایسر کننگ آ نگران وزیراعظم و حکومتی ٹیم انا منت واری  ءِ ہرفے۔ ڈل وزیراعظم  ءِ 1500 میگاواٹ نا پوسکن آ زرکاری نا ڈٹ آتا بابت معلومدار کرے، دا ڈٹ آتیٹی ہندی ذرائع و قابل تجدید توانائی آ سیبو کننگک۔