اسلام آباد۔ 24 جنوری (اے پی پی) پاک فوج انا سروک جنرل سید عاصم منیر پارینے کہ ننا فوج ہروڑنا خطرہ و سازش نا برخلاف ہردم تیار ءِ، پاکستان تینا وتواجہی آ ہچ ءُ سمجھوتہ اس کپک، دہشت گرد آتا برخلاف تو پاکستان نا فوج جنگ کننگ کیک ولے دہشت گردی نا برخلاف مچ آ قوم انا کمک المی ءِ، سوشل میڈیا و پروپیگنڈا نا مسخت بے یقینی، ہڑدڑ ومایوسی تالان کننگ ءِ، سوشل میڈیا نا خبرآتا پٹ وپول بھاز المی ءِ، پٹ وپول و مثبت سوچ آن بیدس راج ہڑدڑنا گواچی مریک۔ اوچارشنبے نادے آ جناح کنونشن سینٹر اسلام آباد اٹی ’’پاکستان نیشنل یوتھ کانفرنس‘‘ آن تران کریکہ۔ آرمی چیف سید عاصم منیر پارے کہ ننا ملک انا ورناک دا قوم و ملک انا روشنا روایت، اقبال و قائد نا تغ تا پوروی نا امین ءُ، پاکستان نا آخبت نا جوڑ کروک و اقبال نا شاہین تتون مخاطب مرسا بھاز خوشی محسوس کننگ اٹی اُٹ، پاکستان ءِ جوڑ کننگ نا مسخت دا ئس کہ ننا مذہب، تہذیب و تمدن ہررداٹ ہندو تیان جتا ءِ نئے کہ نن دیکی تہذیب و تمدن ءِ تینا کین، ورناتے تینا وطن ، قوم ، دودوربیدہ و تہذیب و تمدن و تینےآ بے پناہ پت مرے۔ اوپارے کہ پاکستان نا ورناتے داہیت ءِ یقین مرے کہ او اسہ عظیم وطن و قوم انا گلزادہ ءُ۔ اوپارے کہ سوشل میڈیا و پروپیگنڈا نا مسخت بے یقینی، ہڑدڑ و مایوسی تالان کننگ ءِ، پٹ وپول و مثبت سوچ آن بیدس راج ہڑدڑنا گواچی مریک۔ اوقرآن مجید نا حوالہ ءِ ترساپارے کہ اللہ تعالیٰ قرآن مجید اٹی فرمائفک کہ ’’اے ایمان والاک! اگہ فاسق اس نمے آ خبر اس اتے تو اودے پک کبو‘‘۔ آرمی چیف پارے کہ پاکستان نا قیام نا ریاست طیبہ تون مماثلت ءِ ہڑتوم آ کلمہ غاتا بنداو آ جوڑ مس، اللہ تعالیٰ پاکستان ءِ بے پناہ معدنی وسیلہ ، کشت وکشار و ورناافرادی قوت کون آنعمت آتے تسنے، مسلمان مشکل اٹی صبر و آسانی ٹی اللہ نا شکر ءِ اداکیک، اوپارے کہ پاکستان نا روشنا آخبت آ پورو یقین و اسلاف نا میراث ءِ قائم تخنگ ءِ۔ طالب علم آک تران اٹی پاکستان آرمی زندہ باد، پاکستان زندہ باد و قائد اعظم زندہ باد نا نعرہ ہم خلکر۔
