وزیراعظم انوارالحق کاکڑ نا پاکستان نیشنل یوتھ کنونشن آن تران

اسلام آباد۔ 24 جنوری (اے پی پی) نگراں وزیراعظم انوارالحق کاکڑ پارینے کہ پاکستانی ورناک ننا آبادی نا 65 درسد ءُ، اوفتا اوار مننگ و کمک آن بیدس دہشت گردی نا برخلاف جنگ اٹی سرسہب مننگ کتونہ۔ او پاکستان نیشنل یوتھ کنونشن 2024آن مہمان خاص نا حیثیت اٹ تران کریکہ۔ پاک فوج انا سروک جنرل سید عاصم منیر اعزازی مہمان ئس۔ دود آن تران کرسا وزیراعظم انوارالحق کاکڑ پارے کہ پاکستانی قوم دہشت گردی نا ناسور نا جیرت و نرزوری اٹ مقابلہ ءِ کرے و لازوال قربانی تس، پاک فوج پورو لگن و کسبی مہارت اٹ دہشت گردی نا برخلاف جنگ کرے۔ اوپارے کہ پاکستان نا زموار شاری اس مننگ نا ناطہ نن پاکستان نا برخلاف پاکستان نا دشمن تا تالان کروک آ  پروپیگنڈا ءِ مسترد کین۔ اوپارے کہ پاکستانی ورناک قومی سلامتی نا دا مون آ بروک آ چیلنج تون مون تننگ اٹ اہم ءُ کڑد اس ادا کننگ کیرہ، دا چیلنج نا ہمووخت آ مون ءِ توننگ مریک  ہراتم ورناک، دشمن تا تالان کروک آ پروپیگنڈا ءِ مسترد کرسا ریاست نا کنڈآن تروک آ مستند معلومداری آ انحصار کیر۔