اسلام آباد۔ 24 جنوری (اے پی پی) نگران وزیراعظم انوارالحق کاکڑ پارینے کہ حکومت گردشی وام تیٹی کمتی اتنگ کن حکومت ہرممکن گام گیج کننگ اٹی ءِ ، وزارت توانائی گردشی وام تا چٹفنگ کن اسہ گچین، دیرپاو عمل نا قابل حکمت عملی اس جوڑ کرسا پیش کے، گردشی وام تیٹی کمتی اتنگ کن غٹ فریق آتے اواری اٹ کاریم کروئی مریک۔ چارشنبے نادے آ وزیراعظم آفس نا میڈیا ونگ آن جاری پریس ریلیز نا رداٹ نگران وزیراعظم انوارالحق کاکڑ نا کماشی ٹی توانائی نا بشخ اٹی گردشی وام تیٹی کمتی نا لائحہ عمل آ جاچ دیوان اس اڈہلک۔ دیوان اٹی نگران بنجائی وزیر ڈاکٹر شمشاد اختر ، محمد علی و تعلقدار بڑزکو کمامدارآک بشخ ہلکر۔ داوخت آ نگران وزیراعظم پارے کہ حکومت ءِ سنبھالنگ تون نن اولیتی بنداوتیا زرگزران نا بحالی کن گام گیج کرین، گردشی وام تیٹی کمتی اتنگ کن حکومت ہرممکن گام گیج کننگ اٹی ءِ۔ اووزارت توانائی ءِ پارت کرے کہ گردشی وام تا چٹفنگ کن اسہ گچین ، دیرپا و عمل نا قابل حکمت عملی اس جوڑ کرسا پیش کننگے۔ اوپارے کہ گردشی وام تیٹی کمتی اتنگ کن غٹ فریق آتے اواری اٹ کاریم کروئی مریک۔ انسدادِ بجلی دُزی آپریشن آن بجلی نا بشخوک آ کمپنی تاوصولی تیٹی خاطرخواہ گچینی بسنے۔ دیوان ءِ پیٹرولیم و توانائی نا بشخ آتا گردشی وام تا ساڑی حالیت آتیا سرجم حوال تننگا۔ دیوان ءِ چندی کمپنی تا گردشی وام تا بابت معلومدار و داوام تیٹی کمتی کن چند ی سلاہ ہم پیش کننگا۔ وزیراعظم تعلقدار وزارت ءِ وزارت خزانہ تون سلابت آن پد اسہ جوان ءُ و پائیدار لائحہ عمل اس جوڑ کرسا پیش کننگ نا ہم پارت کرے۔
