لاہور۔ 24 جنوری (اے پی پی) نگران بنجائی وزیر حوالکاری ، شینکاری و پارلیمانی امور مرتضیٰ سولنگی ڈیجیٹل میڈیا نا دور اٹی فیکٹ چیکنگ نا میکنزم ءِ گچین کننگ نا گرج آ زور شاغسا پارینے کہ ڈیجیٹل میڈیا ٹی پوسکن آ ٹیکنالوجی نا فائدہ غاتون خطرہ ہم ساڑی ءِ، صحافت بنداوی وڑاٹ الس نا چاہنگ نا حق انا دفاع ءِ کننگ ءِ۔ مصنوعی ذہانت ءِ کاریم اٹ اتسا بھاز انگا کاریم تے کننگ انگ ءِ ، ڈیجیٹل دور انا بھلا خطرہ غاتا جاچ ءِ ہلنگ المی ءِ۔ داہیت ءِاو چارشنبے نادےآ داڑے یونیورسٹی آف مینجمنٹ اینڈ ٹیکنالوجی نا کنڈآن ارٹ میکو انٹرنیشنل میڈیا اینڈ کمیونیکیشن کانفرنس آن تران کرسا پارے۔ بنجائی وزیر حوالکار ی پارے کہ 2024ءآ چندی ملک آتیٹی گچین کاری نا سال ءِ وخت اس کہ ساڑی آ ڈیجیٹل دور اٹی بھلو چیلنج مون تروک ءِ۔ اوپارے کہ صحافت نا بنداوی کاریم الس نا چاہنگ نا حق انا دفاع کننگ ءِ۔ اومیڈیا انڈسٹری آ زور شاغا کہ او زموارانہ صحافت ءِ مون آ دننگ اٹ تینا کڑد ءِ ادا کے و السی فائدہ غاتا رکھ ءِ پک کے۔ اوپارے کہ ڈیجیٹل دور انا چیلنج آک ہم بھلن ءُ۔ انٹرنیٹ و سوشل میڈیا ٹیکنالوجی نا ارتقاغان ہراڑے فائدہ دوئی مس ہموڑے آرٹیفیشل انٹیلی جنس، ڈیپ فیک، وائس کلوننگ و مس انفارمیشن نا خطرہ غاتیٹی ہم ودکی مس ہراساڑی آدور اٹی جمہوریت، درشانی سلاہ ناآجوئی و آجوئی صحافت ءِ مون تروک خطرہ غاتیان اسہ بھلو خطر ہ اس جوڑ مرسا مون آ بسنے۔ اوپارے کہ میڈیا ٹی پوسکن آ ٹیکنالوجی نا ہراڑے فائدہ ارے ہموڑے خطرہ ہم ارے۔ اوپارے کہ منہ وخت مست ٹرولز فارم بناکرے ہرافتے داسہ انسان تا ہم گرج اف، آرٹیفیشل انٹیلی جنس اسہ بھلو سلہہ اس جوڑ مرسا مون آ بسنے ہراڑآن داممکن ءِ کہ بھا ز کم خڑچ اٹی مصنوعی ٹیکسٹ، مصنوعی توار و مصنوعی ویڈیو تیار کننگ مریک۔ اوپارےکہ صحافت نا بنداوی اصول و تنظیمی پنجر گیٹ کیپر نا نظام ءِ ہراٹی فیکٹ چیکنگ و حقائق آتا پک اونا روح اٹی اوار ئس وخت اس کہ پوسکن آمیڈیا دا گیٹ کیپر نا نظام ءِ گوجالانے ہرانا سوب آن داسہ مخلوق اسکان سچ اتنگ مشکل مسنے۔ اوپارے کہ ڈیجیٹل دور انا بھلا خطرہ غاتا جاچ ءِ ہلنگ المی ءِ، دارداٹ ویری فیکیشن لیبارٹریز جوڑ کننگ نا گرج ءِ وخت اس کہ نیوز رومک راستکی ناجاچ اکن ڈیپارٹمنٹ بایدے جوڑ کیر ۔
