اسلام آباد۔ 23جنوری (اے پی پی) بجلی نا پیدواری مشینری نا درآمد آتیٹی برجامالی سال انا اولیکو 6 تُو اٹی سالانہ بنداوتیا 28 درسد نا کمتی ریکارڈ کننگانے۔ پاکستان بیورو شماریات نا حساب وکتاب نا رداٹ جولائی آن دسمبر اسکان نا مد اٹی بجلی نا پیدواری مشینری نا درآمد آتیا 210 ملین ڈالر نا زرمبادلہ خڑچ مس ہرا تدوک آ مالی سال انا ہندا مد انا مقابلہ ٹی 28 درسد کم ءِ۔ تدوک آ مالی سال انا ہندا مد اٹی بجلی نا پیدواری مشینری نا درآمد آتیا 292 ملین ڈالرنا زرمبادلہ خڑچ مسوسس۔ دسمبر 2023اٹی بجلی نا پیدواری مشینری نا درآمد آتیا 30 ملین ڈالر خڑچ مس ہرا دسمبر 2022نا مقابلہ ٹی 39 درسد کم ءُ۔ دسمبر 2022اٹی بجلی نا پیدواری مشینری نا درآمد آتا کچ 49 ملین ڈالر ریکارڈ کننگاسس۔ نومبر نا مقابلہ ٹی دسمبر اٹی بجلی نا پیدواری مشینری نا درآمد آتیٹی ماہانہ بنداوتیا 35 درسد نا کمتی مس۔ نومبر اٹی بجلی نا پیدواری مشینری نا درآمد آتا کچ 47 ملین ڈالر ریکارڈ کننگا ہرا دسمبر اٹی کم مرسا 30 ملین ڈالر مس۔ یات سلے کہ مالی سال انا اولیکو 6 تُواٹی مشینری گروپ نا درآمد آتیٹی سالانہ بنداوتیا 11 درسد نا ودکی ریکارڈ کننگانے۔ مالی سال انا اولیکو 6 تُو اٹی مشینری گروپ نا درآمد آتا کچ 3.60 ارب ڈالر ریکارڈ کننگا۔ تدوک آ مالی سال انا ہندا مد اٹی مشینری گروپ نا درآمد آتا کچ 3.23 ارب ڈالر ریکارڈ کننگاسس۔
