کوئٹہ۔ 23 جنوری (اے پی پی)بلوچستان اسمبلی نا حلقہ پی بی 40 آن آجو اومیتدار میر حسیب بنگلزئی پاکستان پیپلزپارٹی نا پندار اومیتدار سردار زادہ صمد خان گورگیج نا حق اٹی غیر مشروط وڑاٹ دزکش مننگ نا پڑوکرے۔ داہیت ءِ او اے ون سٹی ٹی واقع تینا دفتراٹی پاکستان پیپلزپارٹی نا راہشون و حلقہ پی بی 40 آن اومیتدار سردار زادہ صمدخان گورگیج تون اوڑدہی آن پد کرے۔ داوخت آ پاکستان پیپلزپارٹی نا راہشون درمحمد ہزارہ، سردار سرور سلیمانخیل، میرمحمد اکرم بنگلزئی و ایلوفک ہم ساڑی ئسر۔ میر حسیب بنگلزئی پارے کہ بلوچستان پیپلزپارٹی نا اومیتدار حلقہ پی بی 40 آن سردار زادہ صمد خان گورگیج علاؤالدین کاکڑ تون اوار اوڑدہی کرے و اوڑتون تینا حق اٹی دزکش مننگ نا اپیل کرے ہراڑآ تینا سنگت آتون سلاہ و مشورہ غان پد اٹ سردار زادہ صمد خان گورگیج نا حق اٹی غیرمشروط دزکش مننگ و پاکستان پیپلزپارٹی ٹی باقاعدہ شمولیت نا پڑو ءِ کیوہ۔ داوخت آ گپ وتران کرسا سردار زادہ صمد خان گورگیج میر حسیب بنگلزئی نا کنڈآن تینا حق اٹی غیرمشروط وڑاٹ دزکش مننگ آ منت واری ءِ ہرفیوہ و پاکستان پیپلزپارٹی ٹی شمولیت آ مبارکبادی ایتیوہ۔ اوپارے کہ 8 فروری آ پیپلزپارٹی مچ آملک آن کلین سویپ کیک و 8 فروری مفاد پرستی نا سیاست چمکائفوک آتیکن احتساب نا دے مریک۔ اوپارے کہ بلوچستان نا الس نا ویل آتا ایسر و شونداری وشونہالی نا نشان بیرہ ’’تیر‘‘ ءِ۔ اوپارے کہ پاکستان پیپلزپارٹی نا چیئرمین بلاول بھٹو زرداری نا 10 ٹکی ایجنڈا پاکستان نا غٹ ویل آتا ایسر ءِ ہرا لس بندغ ءِ کبینی و بے روزگاری آن نجات ایتک، بلاول بھٹو نا10 ٹکی منشور، لاہور جلسہ مخالف آتا تغ ءِ درینے۔ اوپارے کہ الس 8 فروری آ پاکستان پیپلزپارٹی نا اومیتدار آتا گچین کاری نشان ’’تیر‘‘ آ مہر خلسا اوفتے سرسہب کیر تانکہ ملک ءِدُوارہ شونداری و شونہالی نا کنڈآ دننگ مرے۔
