سیکورٹی و امن و ایمنی نا حالیت آتے برقرار تخنگ کن ہرممکن گام گیج کننگک، شاہد اشرف تارڑ

اسلام آباد۔ 23 جنوری (اے پی پی) وزیراعظم نا جوڑ کروک الیکشن سیکورٹی کمیٹی نا سروک ، نگران بنجائی وزیر مواصلات شاہد اشرف تارڑ پارینے کہ نگران حکومت دا بابت الیکشن کمیشن ءِ پورو کمک فراوان کیک و سیکورٹی و امن و ایمنی نا حالیت آتے برقرار تخنگ کن ہرممکن گام گیج کننگک۔ او سے شنبے نادےآ  الیکشن کن وزارت داخلہ نا رداٹ جوڑ کنٹرول روم انا دورہ ءِ کننگ نا وخت آ گپ وتران کریکہ۔ داوخت آ سیکرٹری داخلہ آفتاب اکبر درانی ہم ساڑی ئس۔ کوآرڈی نیٹر نیشنل ایکشن پلان نا کنڈآن کنٹرول روم نا بابت بنجائی وزیر مواصلات ءِ سرجم حوال تس۔ نگران بنجائی وزیر مواصلات شاہد اشرف تارڑ پارے کہ دا کنٹرول روم انا کمک اٹ ملک اٹی گچین کاری تیٹی سیکورٹی و امن و ایمنی نا حالیت آتا چاروکی ءِ کننگک۔ اوپارے کہ آئین نا رداٹ ملک اٹی شفاف گچین کاری تا اڈتننگ نا بنداوی زمواری الیکشن کمیشن نا ءِ۔ کنٹرول روم ءِ جوڑ کننگ ہم ہندا چرجوئی نا کڑی ءِ تانکہ امن و ایمنی نا حالیت آتا ہمہ وخت چاروکی ءِ کننگے، غٹ اسٹیک ہولڈر آتون براہ راست رابطہ قائم کننگے و ہروڑنا ہلہلہ ئی حالیت آتیٹی پبی ورندی کارروائی کننگے۔ اوپارے کہ وزیراعظم نا پارت آ غٹ صوبہ غاتا دورہ ءِ کننگک تانکہ جم سیکورٹی حالیت آتا جاچ ءِ ہلنگ مرے و دارداٹ بست وبند آتے گڈیکو دروشم اس تننگے۔