ہشت فروری نا گچین کاری تا کوریج کن درملکی مبصر و صحافیک پاکستان  آ سرمریرہ ، 49 درملکی صحافی تے ویزہ جاری، نگران بنجائی وزیر حوالکاری مرتضیٰ سولنگی نا پریس کانفرنس

اسلام آباد۔ 23 جنوری (اے پی پی) نگران بنجائی وزیرحوالکاری ، شینکاری و پارلیمانی امور مرتضیٰ سولنگی پارینے کہ 8 فروری نا گچین کاری تا کوریج  وشفافیت نا جاچ ءِ ہلنگ کن 14 ملک آتیان میڈیا نا نمائندہ و مبصر پاکستان آ سرمریرہ، 49 درملکی صحافی تے ویزہ جاری کننگانے، 32 درخواست آتیاکاریم برجاءِ، پاکستان اٹ ساڑی درملکی میڈیا ہاؤس آتا نمائندہ غاتا ایکریڈیشن کارڈ انا دوئی کننگ کن درخواست موصول مسنے، الیکشن کمیشن و نگران حکومت درملکی مبصر و صحافی تے پورو آسراتی فراوان کیرہ۔ داہیت ءِ او سے شنبے نادے آ داڑے پریس کانفرنس آن تران کرسا پارے۔ داوخت آ بنجائی سیکرٹری حوالکاری شاہیرہ شاہد، ایگزیکٹیو ڈائریکٹر جنرل ایکسٹرنل پبلسٹی ونگ عنبرین جان، ایگزیکٹیو ڈائریکٹر جنرل پریس انفارمیشن ڈیپارٹمنٹ ڈاکٹر طارق محمود و ڈائریکٹر جنرل ریڈیوپاکستان سعید احمد شیخ ئسک ہم ساڑی ئسر۔ بنجائی وزیر حوالکاری پارے کہ گچین کاری تا بابت قیا س آرائی آن پاناد کننگے، گچین کاری تا کوریج کن درملکی میڈیانا نمائندہ غاک مہالو آن پاکستان اٹی ساڑی ءُ۔ اوپارے کہ الیکشن کمیشن نا کنڈآن الیکشن نا کوریج کن درملکی صحافی و مبصرآتا درخواست تننگ نا آخیریکو تاریخ 20 جنوری مقرر کننگاسس ولے دا تاریخ آن پد ہم درملکی صحافی و مبصرآتا درخواست موصول مننگ ءِ۔ اوپارےکہ داتم اسکان درملکی صحافی تے 49 ویزہ جاری کننگانے وخت اس کہ 32 درخواست آتیاکاریم برجاءِ۔ اوپارے کہ پاکستان ہائی کمیشن نئی دہلی آن ہم کم وود 24 درخواست موصول مسنے ہراانڈرپراسیس ءُ۔ جم وڑاٹ میڈیا نا چندی ادارہ غاتا کنڈآن 174 درخواست موصول مسنے۔ داکان بیدس غیر صحافی کیٹیگری ٹی بیرہ برطانیہ غان درملکی مبصرآتا 25 درخواست آتیاکاریم برجاءِ، ہندا وڑ رشین فیڈریشن نا کنڈآن8، جاپان آن 13 درخواست آتیا سجفنگ انگ ءِ وخت اس کہ کینیڈاغان پارلیمنٹ نا 5 باسک  درخواست تسنو۔ سویلی افریقہ غان 2 مبصرو کامن ویلتھ آں پنچ درخواست دوئی مسنے ہرافتیاکاریم برجاءِ۔ اوپارے کہ داوخت اسکان پاکستان اٹی 6065 صحافی تے ایکریڈیشن کارڈ تننگانے ہرافتے ٹی لاہور آن 1200، کراچی آن 1470، پشاور آن 1250، کوئٹہ غان 600، حیدر آباد آن 355، فیصل آباد آن 250 و ملتان آن 290 صحافی اوار ءُ ۔ اوپارے کہ جہانی  صحافی و مبصر آک کراچی، لاہور، اسلام آباد کن موکل نامہ ہلکنو، دامسہ بھلا شار تیان بیدس اگہ صحافی اس پین شاراسے آ ہِننگ خوائے تو اونا کیس بائی کیس جاچ ءِ ہلنگک۔ اوپارے کہ 20 جنوری نا تاریخ گدرینگ انگ آن پد ہم داسہ ہم الیکشن کمیشن و وزارت حوالکاری نا تعلقدار ادارہ غاک دا درخواست آتیا سجفنگ ءُ۔ صحافی تا سوج آتا ورندی ءِ ترسا بنجائی وزیر حوالکاری پارےکہ ریاست نا زمواری ءِ کہ او تینا شاری تا رکھ ءِ کے، درملکی صحافی و مبصرآتے سیکورٹی فراوان کننگک۔ ایگزیکٹیو ڈائریکٹر جنرل ایکسٹرنل پبلسٹی ونگ عنبرین جان اسہ سوج اسےے نا ورندی ٹی پارے کہ گچین کاری تا کوریج کن 14 ملک آتیان 81 درخواست دوئی مس ہرافتیان 49 درملکی صحافی تے ویزہ جاری کننگا وخت اس کہ ایلو درخواست آتیاکاریم برجاءِ۔ اوپارے کہ 174 صحافی مہالو آن ایکریڈیشن کارڈ اکن درخواست تسوسر ہرا پاکستان اٹی ساڑی آفارن میڈیا ہاؤس آتیکن پاکستان اٹ تولسا کاریم کننگ ءُ۔