موسمیاتی بدلی نا چیلنج اتون مون تننگ کن پوسکن آ کشاری ٹیکنالوجی و گچین فیصلہ سازی المی ءِ، صدر مملکت

اسلام آباد۔ 23 جنوری (اے پی پی) صدر مملکت ڈاکٹر عارف علوی پاکستان اٹی قدرتی وسیلہ غاتا فراوانی نا حوالہ ءِ ترسا پارینےکہ ملک اٹی موسمیاتی بدلی نا چیلنج تون مون تننگ کن پوسکن کشاری ٹیکنالوجی و گچین فیصلہ سازی ءِ تینا کننگ المی ءِ۔ سے شنبے نادے آ داڑے انسٹی ٹیوٹ آف ریجنل سٹڈیز نا کنڈآن ’’موسمیاتی تنکی: سویلی ایشیانا لچک نا تشکیل‘‘ نا سرحال آ ریجنل ڈائیلاگ 2024اٹی تینا بنائی  تران اٹی صدر مملکت پارے کہ پاکستان دیر، قابل تجدید توانائی نا لائخی و ایلو وسیلہ غاتیان شپ ءِ ولے اودے فیصلہ غاتیا عملدرآمد و مطابقت ودی کننگ نا گرج ءِ۔ اومسکوہی سفارتکار، تعلیم نا چاہندارو پولکار آتا مچی ءِ پارے کہ پاکستان تون کم و ود 150 ملین ایکڑ فٹ دیر ساڑی ءِ ہرا اسپرے و ڈرپ اریگیشن کون آ پوسکن آ کشاری تکنیک ءِ تینا کننگ و آبپاشی نا روایتی وڑوڈول آتے بدل کننگ نا حالیت اٹ اونا گرج آتے پورو کننگ کن گنج اسے، قومی آبی پالیسی و ایلو تعلقدار کانود نا نفاذ آ زور شاغسا، اوپارےکہ پرائسنگ میکنزم ہم دیر انا بچت نا سوب مننگ کیک۔ اوپارے کہ کراچی ٹی ہڑدے کم و ود 400 ملین گیلن دیر سیوریج نا کمک اٹ سمندر اٹ شاغنگک ہراکہ اسہ ڈوہ اسے۔ اوماہی گیر آتا کنڈآن ممنوعہ جال آتا کاریم اٹ اتنگ  ءِ ہم مون آتخا ہراٹی سمندری حیات نا بھاز زیات نسخان مریک۔ اوپارےکہ چندی سوب آتا بناء آ یورپ پاکستان آن مچھی نا درآمد نا موکل تفننگ ءِ۔