اقوام متحدہ۔ 22 جنوری (اے پی پی) اقوام متحدہ پارینے کہ اسرائیل نا فوجی کارروائی تیٹی غزہ ٹی خلنگوک آ بندغ آتا کچ یوکرین و عراق نا جنگ آتیٹی داتم اسکان جم وڑاٹ خلنگوک آ بندغ آتا کچ آن ودانے۔ الجزیرہ نا رداٹ مقبوضہ فلسطینی علاقہ غاتا بابت اقوام متحدہ نا خصوصی نمائندہ فرانسسکاالبانی ایکس آ اسہ پوسٹ اسے ٹی پارے کہ حماس نا 7 اکتوبر نا جلہو آتیان پد آن اسرائیلی فوج غزہ نا 1.1 درسد آبادی ءِ خلکنے وخت اس کہ یوکرین و عراق نا جنگ آتیٹی دا ملک آتیٹی بالترتیب 0.2 درسد و 0.8 درسد آبادی خلنگاسس۔ فرانسسکا البانی مستی پارے کہ بھسکاری نا رداٹ دا پیڑی ٹی اسہ جنگ اس ہم غزہ نا جنگ انا خڑک اسکان سرمننگ کتنے۔ دسمبر اٹی اقوام متحدہ نا انسانی حق انا دفتر فروری 2022اٹی روس انا فوجی کارروائی نا بنامننگ آن پد آن یوکرین اٹی بیرہ 10 بندغ آتا خلنگ ءِ پک کرینے۔
