نگران بنجائی وزیر حوالکاری مرتضیٰ سولنگی نا ڈائریکٹر جنرل ریڈیوپاکستان سعید احمد شیخ نا لمہ نا کزیت آ ہڑزخواہی کن ریڈیو پاکستان آ بس

اسلام آباد۔ 22 جنوری (اے پی پی) نگران بنجائی وزیر حوالکاری و شینکاری و پارلیمانی امور مرتضیٰ سولنگی دوشنبے نادے آ ڈائریکٹر جنرل ریڈیو پاکستان سعید احمد شیخ نا لمہ نا کزیت آ ہڑزخواہی کن ریڈیوپاکستان آ ہنا و سعید احمد شیخ نا لمہ ایماندار نا روح انا ثواب کن دعاپاتیاکرے۔ داوخت آ ڈی جی ریڈیوپاکستان سعید احمد شیخ تون گپ وتران کرسا نگران بنجائی وزیر حوالکاری پارے کہ لمہ نا ہچ ءُ بدل اس اف، لمہ نا کزیت بھلو صدمہ و بے بدل ءُ نسخان اسے ، تینا زند آن لمہ ءِ کشن تو زند اٹی ہچ اس سلپک۔ نی آخیریکو دے تیٹی تینا لمہ نا بھاز خذمت ءِ کریس ہرا است جمی نا سوب ءُ۔ اودعاکرے کہ اللہ تعالیٰ ایماندار ءِ جنت الفردوس اٹی بڑزکو ہند و سعید احمد شیخ اتون اوار غٹ خاہوت ءِ صبر وجمیل عطاکے۔ آمین