اسلام آباد۔ 22 جنوری (اے پی پی) نگران بنجائی وزیر حوالکاری، شینکاری و پارلیمانی امور مرتضیٰ سولنگی پارینے کہ گچین کاری تا اڈتننگ نا بابت غٹ مفروضہ و ہوکاک دم تسنو، 8 فروری 2024ء آ سہب انا 8 بجہ غاپولنگ اسٹیشنک ملنگرہ و پاکستان نا الس تینا وونٹ انا حق ءِ کاریم اٹ اتیرہ۔ دوشنبے نادے آ داڑے ہندی ہوٹل اٹی پاکستان انسٹیٹیوٹ آف ڈویلپمنٹ اکنامکس (پائیڈ) نا کنڈآن اصلاحاتی منشور نا جاری کننگ نا دود آن تران کرسا بنجائی وزیر حوالکاری پارے کہ 17 اگست 2023ء آ نگران کابینہ نا سوغنگ ہرفنگ آن پد آن پدریسہ ہندا پاننگ اُن کہ گچین کاریک تینا تخوک آ وخت آ مریرہ و الیکشن کمیشن ءِ کمک فراوان کننگ ننا زمواری ءِ ، پاکستان نا آئین نا دیباچہ ٹی نوشتہ ءِ کہ دا ملک ءِ اونا گچین مروک آ نمائندہ غاک چلیفرہ، گچین کاری تا وخت آ اڈتننگ نا بابت کس اسے بایدے شک و شبہ مف۔ اوپارے کہ گچین کاری تا اڈتننگ نا بابت میڈیانا زمواری مست آن زیات ودک ،میڈیا ءِ دا رداٹ زموارانہ رپورٹنگ کروئی مریک۔ بنجائی وزیر حوالکاری پارے کہ ملک ءِ زرگزران، خارجہ پالیسی، خراج اصلاحات، جان جوڑی، تعلیم، و آبادی ٹی ودکی کون آ ویل و چیلنج مون تروک ءِ۔ کشت وکشار ملک انا جی ڈی پی نا اسہ چارمیکو بشخ ءِ ولے دابشخ آن خراج نا وصولی بھاز کم ءِ۔ اوپارے کہ پاکستان نا آئین نا آرٹیکل 140 و140 اے نا رداٹ ہندی حکومت آک مالی، سیاسی ، و انتظامی وڑاٹ وتواجہ مریرہ، 18 می ترمیم نا رداٹ صوبہ غاتے زیات واکداری تننگا ولے دا واکداریک شیفکو کہول آ منتقل مننگ کتور۔ اوپارے کہ قومی و صوبائی اسمبلی تا باسک آتا اصل کاریم کانود سازی و ملک انا پیچیدہ ویل آتے ایسر کننگ ءِ، دعویٰ و قول آتا پوروی سیاسی جماعت آتا کاریم ءِ۔ اوپارےکہ سیاسی جماعت آتا تہہ ٹی جمہوری رویہ غاتا گرج ءِ، منہ دے مست اسہ عدالتی فیصلہ سے اٹ اسہ نظیر اس جوڑ مسنے کہ جماعت آتا تہہ ٹی گچین کاری و جمہوریہ بایدے مرے۔ اوپارےکہ اگہ جماعت اسے ٹی جمہوریت مف تو او ہراوڑ ملک اٹی جمہوریت نا دعویدار مننگ کیک؟ بنجائی وزیر پارے کہ ملک انا بنداوی ویل آتیا گپ وتران مرے و الس نا شعور اٹی ودکی مننگ المی ءِ۔
