کوئٹہ۔ 19 جنوری (اے پی پی)پاکستان پیپلزپارٹی بلوچستان نا جنرل سیکرٹری و حلقہ این اے 263 آن اومیتدار روزی خان و حلقہ این اے 262 آن اومیتدار حاجی رمضان اچکزئی ئسک پارینو کہ پاکستان پیپلزپارٹی ملک آن خارتا چٹفنگ امن و ایلمی نا مون آ دننگ کن جہد کننگ ءِ ورناسرکڑدہ چیئرمین بلاول بھٹو زرداری سہی وڑاٹ الس ناخذمت ءِ کننگ کیک ، پیپلزپارٹی مدام الس نا حق و ساف و شفاف گچین کاری تا ہیت ءِ کرینے 2018 ء نا گچین کاری تیانبار داسہ کس اسے پارٹی مینڈیٹ ءِ دُزنگ نا موکل تفنہ۔ داہیت ءِ اوفک بلوچستان امن جرگہ نا سروک لالایوسف خلجی و انجینئر ہادی عسکری تون جتا جتا اوڑدہی وکارنرمیٹنگ آن تران کرساپاریر۔ داوخت آ پیپلزپارٹی نا صوبائی فنانس سیکرٹری ملک حمید کاکڑ، ڈپٹی انفارمیشن سیکرٹری قاسم خان اچکزئی ، عیسیٰ خان ہزارہ، پیپلزپارٹی نا صوبائی میڈیا کوآرڈی نیٹر حیات خان اچکزئی، اخترشاہ مندوخیل، جبارخلجی، سید ایوب آغا وایلوک ہم ساڑی ئسر۔ اوفک پاریر کہ 2018 ء نا گچین کاری تیٹی پاکستان پیپلزپارٹی نا مینڈیٹ ءِ دُزی کرسا عمران نیاز ی ءِ الس آ مسلط کننگا ہراملک ءِ بھسکاری نا دنگ آ سرکرے و تینا سیاسی مخالف آتے زندان اٹی بند و اوفتیا دروغ انا مقدمہ جوڑ کرے بانی پی ٹی آئی بیر انا خاخر اٹ اینو زندان اٹی ءِ وخت اس کہ نواز شریف بدلہ نا خاخر اٹ سیاست کننگ ءِ، چیئرمین بلاول بھٹو زرداری دا متکن آ طرز انا سیاست و ملک آن خار تے چٹفنگ خواہک۔ اوفک پاریر کہ پاکستان پیپلزپارٹی الس ناو اک آ یخین تخک و انشاء اللہ الس نا وونٹ آتا واک اٹ 8 فروری آ بھلو گیشتری اسے اٹ سرسہبی دوئی کیک۔ اوانجینئر ہادی عسکری نا کنڈآن پیپلزپارٹی نا حلقہ این اے 262 آن اومیتدار حاجی رمضان اچکزئی و پی بی 40 آن اومیتدار صمد گورگیج نا حق اٹی دزکش مرسا اوفتا پورو مخ تفی ءِ کرے وخت اس کہ بلوچستان امن جرگہ نا سروک لالایوسف خلجی ہم پاکستان پیپلزپارٹی نا اومیتدار آتا پورو مخ تفی نا باوری ءِ کرفے۔
