کوئٹہ۔ 19 جنوری (اے پی پی)بلوچستان امن جرگہ نا سروک لالایوسف خلجی ایران نا پاکستانی دنگ اٹ جلہو نامذمت ءِ کرساپارینے کہ پاکستان آ جلہو اصل اٹ اسرائیل و امریکہ نا فلسطین آ ظلم و وحشیانہ بمباری آن چکار ءِ اسہ کنڈ کننگ نا کوشست اسے پاکستان ایران نا کنڈآن جلہو نا گچین وڑاٹ ورندی ءِ ترسا داپک کرینے کہ پاکستان اسہ پرامن ایٹمی ملک اسے و ہروڑنا جارحیت نا پبی ورندی ءِ تننگ نا لائخی تخک۔ داڑے جاری مروک اسہ بیان اسے ٹی لالا یوسف خلجی پارے کہ پاکستان تدوک آ کیہی وخت آن دہشت گردی نا گواچی ءِ و دہشت گرد آک پاکستان آ جلہو کرسا ہمسایہ ملک آ نررہ، ہرانا شاہدی ءِ پاکستان اٹ وار ہمسایہ ملک آتے فراوان کرے، اوپارے کہ داکان مست بھارتی جاسوس کلبھوشن ہم ایران آن پاکستان آ جلہو کرسا کرینے۔ اوپارے کہ ایران پاکستانی علاقہ ٹی میزائل جلہو کرسا جہانی کانود نا خلاف ورزی کرے پاکستان گچین وڑاٹ اونا ورندی ءِ تس ہرا ستاکڑزک۔ اوپارے کہ ایران نا پاکستان آ جلہو اصل اٹ اسرائیل و امریکہ نا بے گناہ فلسطینی الس آ برجاوحشیانہ بمباری آن چکار ءِ اسہ کنڈ کننگ نا سازش اسے امریکہ اوغانستان، عراق تون اوار ایلو ملک آتیا تو جلہو کرسا کرینے ولے اینواسکان امریکہ ایران نا برخلاف ہچ ءُ کارروائی اس کتنے ہراڑآن داپک مریک کہ ایران امریکہ نا’’بگل بچہ‘‘ ءِ۔ اوپارے کہ پاکستان اسہ پرامن ایٹمی قوت اسے و ہروڑنا جارحیت نا پبی ورندی ءِ تننگ نا لائخی تخک ہرانا پیدوار شاہدی ایران ءِ گچین وڑاٹ ایران اٹ ساڑی دہشت گرد آتے شست کننگ ءِ۔ اوپارے کہ پاک فوج ملک انا دفاع و الس نا جان و مال انا رکھ اکن ہروخت تیار ءِ اسہ ہم پاکستان دشمن ملک اس غلط گمانی ٹی مف۔
