کوئٹہ۔ 19 جنوری (اے پی پی)چیئرمین اسٹینڈنگ کمیٹی پیٹرولیم و رسورسز و سیاسی و اقتصادی امور نا ماہر سینیٹر محمد عبدالقادر پارینے کہ بدبختی اٹ دا وخت آایران، اوغانستان و بھارت اسہ پاکستان مخالف ٹرائکا اس جوڑ مسنو۔ پاکستان ءِ داوخت آ مسہ کنڈآن جلہو آتون مون تروئی تمنگ ءِ بیرہ پاکستان نا سیم انا ہمو بشخ ہرا چین اتون لگک رکھ ءِ و انشاء اللہ رکھ ہی سلک ، پاکستان ءِ تینا جوڑ مننگ نا وخت آن تینا دے ٹک اٹی ساڑی بھارت نا کنڈآن مخالفت نا رویہ ملا وخت اس کہ پاکستان نا دیکی ٹی واقع اوغانستان ہموملک آتیان اسٹ ئس ہرا پاکستان نا جوڑ مننگ آن پد ہرے آ پاکستان ءِ امنا کرے ایران ہمو ملک ءِ ہراغٹ آن مست پاکستان ءِ امنا کرے ولے اوکان پد ایران ہم پاکستان نا سیم آ چھیڑ چھاڑ کننگ نابناءِ کرے۔ داڑے جاری مروک اسہ بیان اسے ٹی سینیٹر محمد عبدالقادر پارے کہ ایران نا کنڈآن پاکستان نا سیمی علاقہ پنجگور نا خڑک کروک آ میزائل آور ڈرون جلہو پاکستان کن بے کچ غیرمتوقع ئس پاکستان ءِ بھارت، اوغانستان و ایران نا کنڈآن دہشت گرد جلہو آتا شست کرسا کننگا، بناآن بھارت پاکستان کن مشکل ودی کننگ نا بناءِ کریسس اوکان پد بھارت تینا اسرورسوخ ءِ اوغانستان و ایران اٹ ودفسا پاکستان اٹ دہشت گردی نا بناءِ کرے تدوک آ منہ وخت آن اوغانستان آن پاکستان آ جلہو مننگ ءِ پاکستان ہر جلہو و دہشت گردی نا واقعہ غان پد وار وارآ اوغانستان ءِ پاکستان آمروک آ جلہو آتا بارواٹی پارے و اوغان کمامدار آتے دہشت گرد آتا برخلاف کارروائی کننگ کن پارے ولے دہشت گردی ءِ توننگتو۔ اوپارے کہ ایران نا پاکستان نا برخلاف جنگ و جھیڑہ نا تکون مننگ بھاز افسوزناک ءِ پاکستان ایران ءِ وار وار آ پارے کہ پاکستان اٹ دہشت گردی کروک آ بی ایل اے نا زموار کارروائی کننگ آن پد ایران اٹ تینے ڈکھرہ ہنداسوب آن ایران دا پاکستان مخالف دہشت گرد آتا برخلاف کارروائی کے ولے ایران پاکستان نا دادشمن تا برخلاف ہچ ءُ کارروائی اس کتو داتسکان کہ بھارت نا دہشت گرد آک چاہ بہار آن پاکستان نا برخلاف دہشت گردی نا واردات کرسا کریر ایران ولداہم چکار کتو بدنام زمانہ بھارتی جاسوس کلبھوشن یادیو سال آتسکان چاہ بہار آن پاکستان آ برساکرے و دہشت گردی کرساکرے حالانکہ بلوچستان نا سیمی علاقہ غان پاکستانی فورس آک اودے دزگیرکریر۔ چیئرمین قائمہ کمیٹی پارے کہ پاکستان تینا غٹ ہمسایہ غاتون متوازن و پرامن تعلقداری تا مون آ دننگ نا خواہندار ءِ، پاکستان اینو ہم دہشت گردی نا بدترین شکار مننگ ءِ پاکستان ہروڑنا دہشت گردی نا ترندی اٹ مذمت ءِ کیک پاکستان داہیت انا خواہندار ءِ کہ دہشت گرد آتا اواری اٹ صفایا ءِ کننگے تانکہ او علاقائی شونداری نا کسر اٹ اڑاند شاغنگ کپس ۔
