واشنگٹن۔ 19 جنوری (اے پی پی) امریکہ ٹی پاکستان نا سفیر مسعود خان پارینے کہ پاک امریکہ تعلقداری فوجی و غیر فوجی ہڑتوم آ بشخ آتیٹی سوگو مننگ ءِ۔ اوواشنگٹن ڈی سی نا پنی آ یونیورسٹی کلب اٹی اسہ بھلو کچ اسے ٹی بشخ ہلوک آتون گپ وتران اٹی زرکاری و واپاری کمکاری آ خاص چکار کرسا اسپیشل انویسٹمنٹ فیسیلی ٹیشن کونسل (ایس آئی ایف سی ) نا زوت آتے اٹ بناکروک آ پلیٹ فارم نا فائدہ غاتیا زور شاغا۔ اوپارے کہ ننے بایدے شریدار مرے، نن اسہ ایلو تون السی کہول آ رابطہ کن بایدے گپ وتران ءِ برجاتخن۔ کلب نا جہانی کمیٹی پاکستانی سفیر مسعود خان ءِ چندی سرحال آتیا ہیت کننگ کن بشخ ہلنگ نا سلہ خلکوسس۔ داوخت آ تھنک ٹینک کمیونٹی نا باسک، پوریاگر، کاروباری بندغ، رائے ساز و میڈیا نا نمائندہ غاک اوار ئسر۔ پاکستانی سفیر پاک امریکہ تعلقداری نا اہمیت ءِ مون آ تخا و پاکستان اٹی 80 امریکی کمپنی تا ساڑی گری نا حوالہ ءِ ترسا پارے کہ امریکہ ءِ پاکستان اٹی کیہی دہائی تیا تالان کمپنی تا آزموندہ و ملک اٹی اونا ساڑی زرکاری نا انفراسٹرکچر نا سوب آن پدریسہ فائدہ مننگ ءِ۔ اوپاکستان وامریکہ نا نیام اٹ سائنس و ٹیکنالوجی نا بشخ اٹی کمکاری نا ساڑی آ معاہدہ ءِ بدلی اتوک آ گوندسا، بڑزکو تعلیم، پٹ وپول و شونداری و ٹیکنالوجی ٹی کمکاری نا بشخ آتیٹی داڑآن پبی فائدہ کننگ نا گرج آ زور شاغا۔ اوکشت وکشار، توانائی، آئی ٹی و معدنیات نا بشخ آتا پیدواری ءِ کرسا زرکارآتیکن خصوصی زرکاری سہولت کونسل (ایس آئی ایف سی ) نا کمک اٹ پاکستان اٹ زرکاری کننگ نا لائخی ءِ تالان کرے۔ اوپارے کہ ننے قابل تجدید ذریعہ، جان جوڑی نا ہُننگ، تعلیم و آئی ٹی نا بشخ اٹی ہم کمک کننگ نا گرج ءِ۔
