کوئٹہ۔ 19 جنوری (اے پی پی) نگران وزیراعلیٰ بلوچستان میر علی مردان خان ڈومکی نا کماشی ٹی بلوچستان اٹی لس گچین کاری تا پرامن اڈتننگ نا بابت جمعہ نادے آ داڑے سی ایم سیکرٹریٹ اٹی بڑزکو کہولی دیون اس اڈ ہلک دیوان اٹی صوبائی انتظامی سیکرٹریز، ڈویژنل کمشنرز، ڈپٹی کمشنرز و پولیس کمامدارآک بشخ ہلکر دیوان اٹی صوبہ ٹی بے کچ حساس پولنگ اسٹیشن تیا سیکورٹی تعیناتی، سی سی ٹی وی کیمرہ غاتا خلنگ و گچین کاری گڑاتا وخت آ فراوانی نا بابت اہم فیصلہ کننگا ، دیوان نا بشخ ہلوک آتے چیف سیکرٹری بلوچستان شکیل قادر خان، ایڈیشنل چیف سیکرٹری داخلہ زاہد سلیم، ڈویژنل کمشنرز و ڈپٹی کمشنر آک حوال تسر، نگران وزیراعلیٰ بلوچستان میر علی مردان خان ڈومکی لس گچین کاری تا پرامن اڈتننگ کن داتم اسکان کروک گام گیج آتیا است جمی نا درشانی ءِ کرساپارے کہ مچ آ صوبہ ٹی ساف و شفاف و بے کنڈ ہلوک گچین کاری تا اڈتننگ کن غٹ تر بست وبند آتے گڈیکو دروشم اس تننگ انگ ءِ حساس و بے کچ حساس پولنگ اسٹیشن تیا ہشت ہزار سی سی ٹی وی کیمرہ نصب مریک گچین کاری تیٹی حسب الطلب پولیس و لیویز کارندہ غاتا تعیناتی کن نفری نا بست وبند ءِ کننگ انگ ءِ ، الیکشن ڈیوٹی کن ریٹائرڈ سیکورٹی کارندہ غاتا خذمت ءِ ہم دوئی کننگک، مرمر انگا و ناقابل رسینگ علاقہ غاتیٹی الیکشن میٹریل نا ترسیل ہیلی کاپٹر نا کمک اٹ مریک وخت اس کہ زیارت و یخ علاقہ غاتیٹی ممکنہ برف انا حالیت اٹ بھلو مشینری اس تعلقدار ڈسٹرکٹ آتیٹی ساڑی مریک نگران وزیراعلیٰ بلوچستان پارت کرے کہ امن کن کروک آ گام گیج آتیٹی پین گچینی اتنگے سیکورٹی کارندہ غاتا کمتی ءِ پورو کننگ کن سلاہ کروک گام گیج آتیا بلاتاخیر کاریم نا بنا ءِ کننگے، داکان مست الیکشن اومیتدار و الس نا غٹ تر گڑتی تا دمدستی ازالہ ءِ کرسا ہندن ءُ سازگار چاگڑد اس جوڑ کننگے ہراٹی الس بے خوف و خلیس تینا وونٹ ءِ تننگ کے ، علاقائی حالیت آتا رداٹ بحالی امن کن انتظامی آفیسر کنٹی جنسی پلان اس جوڑ کرے غٹ ضلع غاتیٹی امن و ایمنی نا حالیت آتیا سخت نظر تخنگے و مخلوق نا چنکا چنکا ویل و غاوتا دمدستی وڑاٹ ایسری ءِ کننگے تانکہ بروک آ دے تیٹی مشکل ودی مف ، نگران وزیراعلیٰ پارے کہ کانود نافذ کروک آ ادارہ غاتا تین پہ تینی رابطہ کاری نا کمک اٹ بلوچستان اٹی پرامن گچین کاری تیکن گام گیج برجاءِ و گچین کاری تا اڈتننگ کن پیش رفت نا ہڑدے ئی بنداو آ جاچ ءِ ہلسا مون تروک مشکل و چیلنج آتا ایسری کن گام گیج کننگ انگ ءِ۔
