کراچی۔18 جنوری (اے پی پی) نگران وزیر مذہبی امور انیق احمد پارے کہ دین ننے غیرمسلم تتون مشترکات آ ہیت کننگ نا تعلیم ایتک۔ داہیت ءِ او پنچ شنبے نادے آاقراء یونیورسٹی ٹی تینا کماشی ٹی بین المذاہب ہم آہنگی سیمینار آن تران اٹی پارے۔ ایلو ترانکار آتیٹی ڈاکٹر محسن نقوی، کارڈ ینل جوزف کوٹس، مفتی ابوبکرمحی الدین، سردار رمیش سنگھ، منوج چوہان و وائس چانسلر اقراء یونیورسٹی ڈاکٹر نصر اکرام ئسک اوار ئسر۔ وزیر مذہبی امور انیق احمد پارے کہ اینو نا راج تیٹی نرمی و گداز چٹسا کننگ ءِ۔ ملک دشمن زموار آک مذہبی افراتفری نا کمک اٹ بے چیٹی ودی کننگ خوارہ۔ راج اٹ ناخوشگوار واقعہ غاتا توننگ کن جہالت نا چٹفنگ المی ءِ۔ ننے راج اٹ رنگ تالان کرسا پین اودے زیباکروئی ءِ۔ اوپارے کہ اسہ مسلمان اسے ٹی خواجہ محمد اکرم صلی اللہ علیہ و آلہ وسلم نااخلاقی عظیمہ نا جھلک بایدے نظر برے۔ قیامت نا دے غیرمسلم مظلوم بندغ نا وکیل خواجہ محمد صلی اللہ علیہ و آلہ وسلم مریک۔ مفتی ابوبکر محی الدین پارے کہ اسلام معاشرت کن بھاز بڑزکو و عمدہ حق تسنے۔
