ڈیجیٹل ادائیگی تیان مالی باندات آتے وخت آ و آسانی اٹ پورو کننگ نا آسراتی دُوبس،نگران وزیرخزانہ ڈاکٹر شمشاد اختر

اسلام آباد۔18 جنوری (اے پی پی) نگران بنجائی وزیر خزانہ، محصولات و اقتصادی امور ڈاکٹر شمشاد اخترپارینے کہ ڈیجیٹل ادائیگی تیان لس شاری و کاروباری بندغ آتے مالی باندات آتے وخت آ و آسانی اٹ پورو کننگ نا آسراتی دُوبسنے، ملک ءِ ڈیجیٹل تون ہم گرنچ کننگ نا خواہندار اُن۔ داخیال آتا درشانی ءِ او پنچ شنبے نادے آداڑے ’پاکستان ڈیجیٹل سٹیک‘‘ ورکشاپ آن تران کرساکرے۔ وزیرخزانہ پارے کہ بل اینڈ ملینڈا گیٹس فاؤنڈیشن و کارانداز نا پاکستان اٹ ڈیجیٹل سٹیک نا تخلیق و عملدرآمد نا بابت گام گیج ستاکڑزک و داڑآن ملک اٹی ڈیجیٹل مالی خذمت آتا فراوانی ٹی کمک رسینگک۔اوپارے کہ گیٹس فاؤنڈیشن و کارانداز نا کنڈآن ڈیجیٹل سٹیک نا تخلیق ڈیجیٹلائزیشن نا حکومتی پالیسی تون موافق ءِ۔ حکومت دا بابت گام گیج کننگ اٹی ءِ۔ وزیرخزانہ پارے کہ ڈیجیٹل ادائیگی تیان لس شاری و کاروباری بندغ آتے مالی باندات آتے وخت آ و آسانی اٹ پورو کننگ نا آسراتی دوبسنے۔ اوپارے کہ اسٹیٹ بینک، ایس ای سی پی، احتساب بیورو و نادرا تون اوار ایلو حکومتی ادارہ غاک پاکستان ڈیجیٹل اسٹیک نا عملداری ٹی حصہ دار ءُ۔ حکومت پاکستان ڈیجیٹل سٹیک نا کمک اٹ شریداری قائم کرسا ملک ءِ ڈیجیٹل ہم گرنچ کننگ نا خواہندار ءِ۔ ڈاکٹر شمشاد اخترپارے کہ دا ڈٹ پاکستان نا شونداری کن بھاز اہم ءِ و دانا سرسہبی کن غٹ وسیلہ غاتے کاریم اٹ اتینہ۔ وزیرخزانہ پارے کہ نن پاکستان اٹ مالی شمولیت، صنفی وتواجہی، نیزگاری ٹی کمتی و گورننس اٹی شفافیت اتنگ نا عہد آ کارفرما اُن۔ متحدہ عرب امارات، ایستونیا و سنگاپور اٹی ڈیجیٹل سٹیک نا توسط اٹ گورننس نانظام اٹی خاطرخواہ گچینی بس و ننا کوشست ءِ کہ پاکستان اٹی ہم دا بابت نمان پیش رفت ءِ ممکن کننگ مرے۔