آپریشن مرگ برسرمچار: پاکستان نا ایرانی صوبہ سیستان و بلوچستان اٹی دہشت گرد آتا ٹھکانہ غاتا برخلاف ملٹری سٹرائیک، چندی دہشت گرد آک خلنگار، ترجمان دفترخارجہ

اسلام آباد۔ 18 جنوری (اے پی پی) پاکستان پنچ شنبے ناسہب ایران نا صوبہ سیستان و بلوچستان اٹی بے کچ مربوط و مخصوص ہدف آتا برخلاف مہارت اٹ فوجی کارروائی تیٹی دہشت گرد آتا ٹھکانہ غاتے شست کرے۔ ‘‘مرگ برسرمچار’’ نا پن اٹ اودیم حوال آتیا تالان آپریشن اٹی چندی دہشت گرد آک خلنگار۔ ترجمان دفترخارجہ نا کنڈآن جاری بیان نا رداٹ تدوک آ منہ سال اٹی پاکستان ایران تون تینا رابطہ غاتیٹی پاکستانی نژاد دہشت گرد، ہرا تینے سرمچار پارہ، نا ایران نا تہہ ٹی حکومتی عملداری آن پیشن علاقہ غاتیٹی رکھ ٹھکانہ غاتا بارواٹی تینا گڑتی آن پدریسہ معلومدار کرساکرینے۔ پاکستان دا دہشت گرد آتا ساڑی گری و اوفتا سرجزآتا پبی شاہدی اتون کیہی ڈوزیئر ہم شیئرکرے۔ ولے ننا سنگین گڑتی تیا عمل مفننگ نا سوب آن دا پن انا سرمچار بے گناہ پاکستانی تا دترءِ وہفسا کرے۔ داکارروائی دا پن انا سرمچار آتا کنڈآن ممکنہ وڑاٹ بھلو کچ اسے آ دہشت گردانہ کارروائی تا بارواٹی مصدقہ انٹیلی جنس ءِ مون آتخسا کننگا۔ ترجمان دفترخارجہ نا رداٹ داکارروائی پاکستان نا غٹ خطرہ غاتا برخلاف تینا قومی سلامتی نا رکھ و دفاع نا بدل مفروک عزم انا درشانی ءِ۔ دابے کچ پیچیدہ آپریشن نا سرسہب اڈتننگ ہم پاکستان نا سلہہ بند فوج انا کسبی مہارت نا پاش آن پاش شاہدی ءِ۔ پاکستان تینا الس نا رکھ و سلامتی کن غٹ المی گام گیج آتے کرسا کیک۔ ترجمان پارے کہ پاکستان، ایران نا وتواجہی و علاقائی سالمیت نا پورو شرف ءِ کیک۔ اینو نا عمل نا اسٹ انگا مسخت پاکستان نا تینا سلامتی و قومی مفاد کن ئس ہرا ننکن غٹ آن مقدم ءِ و ہراڑآ ہچ ءُ سمجھوتہ اس کننگپک۔ ترجمان دفترخارجہ پارے کہ جہانی برادری نا اسہ زموار باسک اسے نا وڑاٹ ، پاکستان باسک ملک آتا علاقائی سالمیت و وتواجہی تون اوار اقوام متحدہ نا چارٹرنا اصول و مسخت آتا پاسداری ءِ کیک۔ دا اصول آتے مون آتخسا، و جہانی کانود نا تہہ ٹی تینا روا حق ءِ کاریم اٹ اتسا، پاکستان وخت اس کہ تینا وتواجہی و علاقائی سالمیت ءِ جواز یا حالیت آتیٹی چیلنج کننگ نا موکل تفک۔ ترجمان پارے کہ ایران ایلم ملک ءِ و پاکستانی الس ایران نا الس کن بے حد شرف و مہرومریبت تخک۔ نن مدام دہشت گردی نا لعنت تون اوار اسیجائی چیلنج آتون مون تننگ کن گپ وتران و کمکاری  آ زور شاغانن و نن اسیجائی ایسر اس پٹنگ نا کوشست ءِ برجاتخنہ۔