ڈیووس۔ 18 جنوری (اے پی پی) پاکستان و دوبئی نا حکومت مواصلات، ریلوائی و بحری امور نا بشخ آتیٹی کمکاری کن بین الحکومتی فریم ورک معاہدہ غاتیا دستخط کرینو۔ وزیراعظم آفس نا میڈیا ونگ آن جاری بیان نا رداٹ نگران وزیراعظم انوارالحق کاکڑ تون ڈیووس اٹی جہانی اقتصادی فورم نا 54 می سالانہ دیوان نا وخت آ متحدہ عرب امارات اٹی جوڑ ملٹی نیشنل لاجسٹک کمپنی ’’ڈی پی ورلڈ‘‘ نا گروپ چیئرمین و سی ای او سلطان احمد بن سلیم اوڑدہی کرے۔ وزیراعظم پاکستان و متحدہ عرب امارات اٹی کاروباری ادارہ غاتا نیام اٹ رابطہ و کمکاری نا مون آدننگ آ است جمی نا درشانیءِ کرے و اونا اہمیت نا ذکر ءِ کرے۔ وزیراعظم پاکستان اٹ تیناکاروباری سرجزآتے ودفنگ اٹ ڈی پی ورلڈ انا است خواہی نا ستاء کرے و کمپنی ءِ حکومت نا کنڈآن پبی مخ تفی نا باورکرفے۔ پاکستان واپار و صنعتی سرجزآتا وت انا وڑاٹ تینا جغرافیائی و اقتصادی وژن آن فائدہ ہرفنگ شریدار ادارہ غاتے آسراتی فراوان کرسا کیک۔ اوڑدہی آن پد وزیراعظم مواصلات، ریلویز و بحری امور نا وزارت و دبئی نا حکومت نا نیام اٹ کمکاری کن بین الحکومتی فریم ورک معاہدہ غاتیا دستخط آتا دود اٹی بشخ ہلک ہراٹی دبئی حکومت نا کنڈآن ڈی پی ورلڈ نمائندگی کرے۔ معاہدہ غاتا رداٹ پاکستان اٹ مربوط فریٹ کوریڈور، ملٹی ماڈل لاجسٹک پارک و ریلوائی نیٹ ورک آ مال برداری نا ٹرمینل آتا جوڑ کننگ تون اوار اوار کرکی اقتصادی زون نا جوڑ کننگ و پورٹ قاسم اٹی نیوی گیشن چینل نا ڈریجنگ نا امور اٹی کمک کننگک۔
