پاکستان تینا قومی سلامتی و علاقائی سالمیت آ سمجھوتہ کپک، تینا گل زمین نا دفاع کن غٹ المی گام گیج آتے کیک، صدر ڈاکٹر عارف علوی

اسلام آباد۔ 18 جنوری (اے پی پی) صدر مملکت ڈاکٹر عارف علوی پارینے کہ پاکستان تینا قومی سلامتی و علاقائی سالمیت آ سمجھوتہ کپک، تینا گل زمین نا دفاع کن غٹ المی گام گیج  آتے کیک۔ ایوان صدر نا پریس ونگ انا رداٹ ایران نا سیستان و بلوچستان صوبہ ٹی پاکستان نا کارروائی آ تینا بیان اٹی صدر مملکت ایرانی شاری تے جانی نسخان آن بچفسا دہشت گرد آتا ٹھکانہ غاتے شست کننگ آ سلہہ بند فوج انا کسبی مہارت نا ستاءِ کرے و پارے کہ دہشت گردی اسہ اسیجائی ءُ چیلنج اسے، دانا چٹفنگ کن جہانی کوشست آتا گرج ءِ۔ اوپارے کہ پاکستان غٹ ریاست آتا وتواجہی و علاقائی سالمیت نا پورو شرف ءِ کیک و ایلو ملک آتیان ہم ہندا اومیت ءِ تخک کہ او جہانی کانود نا خلاف ورزی ءِ کپس۔ صدر مملکت پارے کہ پاکستان و ایران ایلم ملک ءُ، ویل آتے مذاکرات و تین پہ تینی سلابت اٹ ایسر کننگ نا گرج ءِ۔