کوئٹہ۔ 17 جنوری (اے پی پی)پاکستان مسلم لیگ (ن) نا راہشون و حلقہ پی بی 41 آن اومیتدار سحرگل خان خلجی پارینے کہ گچین کاری تیٹی سرسہبی دوئی کرسا شار انا بدحالی ءِ شونہالی ٹی بد ل کینہ، 8 فروری نا دے ملکی شونداری و شونہالی نا پوسکن آ روشنائی اتون پاش کیک و مسلم لیگ (ن) نا قائد میاں محمد نواز شریف ملک انا چارمیکو وار وزیراعظم مریک۔ داہیت ءِ او چارشنبے نادے آ کاسی روڈ، شالدرہ ، میکانگی روڈ آ کارنر میٹنگ آن تران کرسا پارے۔ سحرگل خلجی پارے کہ داوخت آ میاں نواز شریف پاکستان نا پنی آ لیڈر ءِ، 8 فروری آ گچین کاری تیان پد ہر چار آ صوبہ غاتون اوار بنجاٹی مسلم لیگ (ن) نا حکومت مریک۔ اوپارے کہ پارٹی قائد میاں نواز شریف مدام قوم اتون ہراقول آتے کرے او فتے 100 درسد پورو کننگا الس اوڑآ پت کیک انشاء اللہ سرسہبی آن پد حلقہ ٹی شونداری کاریم تا جال اس تالان کیوہ۔ اوپارے کہ بلوچستان اٹی پارٹی نا صوبائی صدر شیخ جعفر خان مندوخیل ، جنرل سیکرٹری جمال شاہ کاکڑ، و ایلو سرکڑدہ غاتا کماشی ٹی پارٹی گچین کاری تیٹی پبی بشخ ہلیک و انشاء اللہ 8 فروری مسلم لیگ (ن) نا سرسہبی نا دے ءِ۔ داوخت آ علاقہ نا متبر آک مسلم لیگ (ن) نا اومیتدار سحرگل خان خلجی ءِ پورو مخ تفی نا باور کرفیر۔
