اسلام آباد۔ 17 جنوری (اے پی پی) پاکستان ایران نا کنڈآن تینا فضائی دنگ انا بلااشتعال خلاف ورزی نا ترندی اٹ مذمت ءِ کرساپارینے کہ پاکستان نا وتواجہی نا دا خلاف ورزی ءِ اسُل منپنہ و دانا سنگین ءُ نتیجہ اس پیش تمنگ کیک، نتیجہ غاتا زمواری پورووڑاٹ ایران آ عائد مریک۔ دفترخارجہ نا کنڈآن جاری بیان اٹی پاننگانے کہ پاکستان ایران نا کنڈآن تینا فضائی دنگ انا بلااشتعال خلاف ورزی نا ترندی اٹ مذمت ءِ کیک ہراٹی اِرا کودک چنازوال و مسہ مسڑ ٹھپی مسنو۔ دفترخارجہ پارے کہ داہیت پین تشویشناک ءِ کہ پاکستان و ایران نا نیام اٹ رابطہ نا چندی چینل ساڑی مننگ آن پد ہم داغیرکانودی عمل مسنے۔ پاکستان نا کنڈآن مہالو آن تہران اٹی ایرانی وزارت خارجہ ٹی تعلقدار سینئر عہدیدار آتون داواقعہ غا برانز درج کرفنگانے۔ داکان بیدس ایرانی ناظم الامور ءِ ہم وزارت خارجہ ٹی طلب کننگانے تانکہ پاکستان نا وتواجہی نا دا صریح خلاف ورزی نا ترندی اٹ مذمت ءِ کننگے و داکہ دانا نتیجہ غاتا زمواری پورو وڑاٹ ایران آ عائد مریک۔ پاکستان مدام پارینے کہ دہشت گردی ڈیہہ انا غت ملک آتیکن اسیجائی خطرہ اسے ہراڑکن مربوط کارروائی نا گرج ءِ ، داوڑنا اسہ کنڈی کارروائی گچین ہمسایہ تعلقداری نا رداٹ اف و دا ہڑتوم آ کنڈآتا پت ءِ بھاز نسخان تننگ کیک۔
