حکومتی خڑچ آتیٹی کمتی اتنگ و کٹیاٹی ودکی ننا بنداوی مسخت ءِ، نگران وزیراعظم انوارالحق کاکڑ

ڈیووس۔ 17 جنوری (اے پی پی) نگران وزیراعظم انوارالحق کاکڑ پارینے کہ پاکستان گچین محل و وقوع نارداٹ اہم ءُ واپاری سنگم اسے نا واقع ءِ، طرز حکمرانی پدریسہ گچین مننگ ءِ، حکومتی خڑچ آتیٹی  کمتی اتنگ و کٹیا ٹی ودکی ننا بنداوی مسخت ءِ، خراج نا نظام اٹی اصلاحات اتنگ اُن، خراج وصولی ءِ ودفنگ و کٹیا ٹی ودکی کن نجی بشخ انا است بڈی ءِ کننگک۔ داخیال آتا درشانی ءِ او چارشنبے نادےآ داڑے جہانی اقتصادی کمکاری فورم اٹی پاتھ فائنڈرزبریک فاسٹ انا دود اٹی گپ وتران کرسا کرے۔ دود اٹی پنی آ پاکستانی شخصیت آتون اوار اوار مچ آ دنیا غان بروک دانشور، مصنف، انسانی آسودہی نا تنظیم تا سروک آ ک بشخ ہلکر۔ نگران وزیراعظم انوارالحق کاکڑ پارے کہ پاکستان 24 کروڑ نا آبادی تخوک آ عظیم ملک ءِ ہرا تینا محل و وقوع نا لحاظ اٹ اہم واپاری سنگم آ واقع ءِ۔ پاکستان تینا محل وقوع نا بنداو آ ڈیہہ اٹی رابطہ نا ذریعہ ءِ۔ قدرت پاکستان ءِ بے پناہ نعمت تسنے۔ اوغانستان ہم ننا ہمسایہ ٹی واقع ءِ ہراے اقبال ایشیانا است گوندا و ہموڑے سوگوی نا مچ آ ڈیہہ آ اثرتمک۔ اوپارے کہ پاکستان ای سی اونا ہم اہم باسک ءِ۔ ننا ہمسایہ ٹی چین اٹی 336 ٹریلین ڈالرنا واپار مننگ ءِ وخت اس کہ داکان مون خلیج کمکار کونسل نا ملک آتا ہائیڈروکاربن برآمد ات اونا زرگزران ءِ سوگو و متنوع کرینے۔ اوفتے تون سرمایہ نا بہتات ءِ ولے اوفتا آبادی کم ءِ  ہرانا سوب آن اوفتے پیشن نا ملک آن افرادی قوت خواہفوئی تمک و داڑکن اوفتے پاکستان، بنگلہ دیش و بھارت آن افرادی قوت میسر ءِ۔ پاکستان ءِ صنعتکاری نا مون آ دننگ کن زیات پرکشش و مسابقت نا حامل و آسراتی فراوان کروک آ ملک انا حیثیت دوئی ءِ۔ نگران وزیراعظم پارے کہ چین اٹی جدیدیت نا سفر 1979آن پد بناکرے و او تیناگڑاس صنعت  آتے ایلو ملک آتیا گدریفنگ ءِ، داڑکن سویل ایشیادے ٹکی ایشیاتون پاکستان ہم ہمو ملک ءِ ہراڑے دا صنعت آتے خلنگک۔