ڈیووس۔ 17 جنوری (اے پی پی) نگران وزیراعظم انوارالحق کاکڑ پارینے کہ پاکستان اٹی لس گچین کاری تا تیاریک برجاءُ، الس 8 فروری آ تینا حق رائے دہی ءِ کاریم اٹ اتسا بروک آ 5 سال اکن حکومت نا گچینی ءِ کیک، زرگزران نا بحالی اولیت ءِ، اقتصادی اصلاحات المی ءِ، پاکستان اٹ کس اسے سیاسی سوب آتا بناء آ زندان اٹ شاغنگتنے، بے چیٹی تالان کننگ و ہنگامہ غاتیٹی اوار زموار آک کانود و عدالت آتون مون تننگ ءُ۔ داخیال آتا درشانی ءِاو جہانی اقتصادی فورم اٹی بشخ ہلنگ نا وخت آ ’’سی این بی سی ‘‘ ءِ تروک آ انٹرویو ٹی کرے۔ نگران وزیراعظم انوارالحق کاکڑ اسہ سوج اسے نا ورندی ٹی پارے کہ الیکشن کمیشن بروک آ گچین کاری تیکن آئینی خواست آتے پورو کرینے۔ پاکستان اٹ لس گچین کاری تا تیاریک برجاءُ۔ گچین کاری تا اڈتننگ آئینی زمواری ءِ ہرا دے نگران حکومت جوانی اٹ سرایتک۔ اوپارےکہ پاکستانی الس ءِ گچین کاری تیٹی وونٹ بِٹنگ نا موقع فراوان کننگ ننا زمواری ءِ۔ گچین کاری تیٹی الس بروک آ 5 سال اکن تینا نمائندہ غاتے گچین کیک۔ اوپارے کہ پاکستان تون اوار دنیا نا کیہی ڈیہہ و ملک آتیٹی جمہوریت ارتقائی ریسہ غاتیان گدرینگ انگ ءِ ہراٹی چندی وڑنا چیلنج مون تروک مریک۔ دیکی ملک آتیٹی ہم جمہوریت تینا بڑزکو آب آتیا پورو سلپک۔ پاکستان اٹ لس گچین کاری تا جاچ ءِ ہلنگ کن ملکی و درملکی میڈیانا نمائندہ غاتیان بیدس جہانی مبصر آک ہم ساڑی مریرہ۔ میڈیا نا آجوئی نا بابت اسہ سوج اسے نا ورندی ٹی اوپارے کہ پاکستان اٹ میڈیا ءِ دیکی میڈیاغان زیات آجوئی دوئی ءِ۔ دیکی ٹی میڈیانا زی آ زیات سخت ریگولیشنز ءِ۔ اسہ سیاسی جماعت اسے نا راہشون اسے نا زندان اٹ مننگ نا بابت سوج انا ورندی ٹی وزیراعظم پارے کہ پاکستان اٹ سیاسی آجوئی ءِ، اسہ سیاسی جماعت اسے نا راہشون اس ہم تینا سیاسی رائے یا خیال آتا سوب آن زندان اٹی اف ، ہرافک زندان اٹی ءُ او بے چیٹی و ہنگامہ غاتیٹی اوار ءُ ، ہر مستحکم جمہوری ملک اٹی ہنگامہ و بے چیٹی سگ انا قابل مفک۔ کانود و نظام انصاف تینا کسر ءِ اختیار کیک۔ اسہ سوج اسے ناورندی ٹی وزیراعظم پارے کہ زرگزران نا بحالی ننا اولیت ءِ، اقتصادی ٹک آتے سہی کنڈآ دننگ کن اصلاحات نا عمل المی ءِ۔ اوپارے کہ آئی ایم ایف نا شڑت آتے پورو کننگ اُن۔ نگران وزیراعظم پارے کہ دہشت گردی نا برخلاف پاکستان نا اسہ سوگو ءُ موقف اسے ، پاکستان ہروڑنا دہشت گردی نا مذمت ءِ کیک، غیرکانودی اوغان مہاجرآتا پدی ہِننگ بھا ز المی ئس۔ اوپارے کہ پاکستان تدوک آ چار پنچ دہائی آن اوغان مہاجرآتا مہمانداری ءِ کننگ ءِ ، غیرکانودی وڑاٹ رہینگوک درملکی پاکستان نا سیکورٹی کن خطرہ ئسر، پاکستان آ ہرکس کہ بننگ خوائے او کانود دستاویز آتون بننگ کیک۔ اسہ سوج اسے نا ورندی ٹی وزیراعظم پارے کہ پاکستان نا چین اتون تعلقداری نا اسہ تاریخ اسے، لس گچین کاری تیان پد پاکستان نا زرگزران و ساسی سوگوی ٹی شونداری کننگ نا پبی لائخی اس ساڑی ءِ۔
