اسلام آباد۔ 16 جنوری (اے پی پی) پاکستان اٹی چین نا سفیر جیانگ ژائی ڈانگ پارینے کہ بی آر آئی دنیا نا غٹ آن بھلا جہانی کمکاری نا پلیٹ فارم جوڑ مسنے، چین وپاکستان اسہ ایلو آن ہیل کیر، تین پہ تینی فائدہ غاتا بنداو آ کمکاری، بریبری و منظم نظام نا ٹہیفنگ و اسیجائی شونہالی و جوان اقتصادی گلوبلائزیشن ءِ مون آدیر۔ داخیال آتا درشانی ءِ او تینا اسہ انٹرویو اسے ٹی پارے کہ چین دنیا نا 150 ملک و 30آن زیات جہانی ادارہ غاتون 200 آن زیات بی آر آئی نا بابت کمکاری نا معاہدہ غاتیا دستخط کرینے۔ 3 ہزار آن زیات ڈٹ آتا بناءِ کننگانے و 10 کھرب ڈالر نا زرکاری کننگانے۔ بی آرآئی دنیا نا غٹ آن بھلا جہانی کمکاری نا پلیٹ فارم جوڑ مسنے۔ اوپارے کہ نن پراعتماد اُن و داقابل ہم ارین کہ نن تینا زرگزران ءِ سوگو شونداری فراوان کین و چینی الس نا راجی آسودہی ءِ مون آدین و داڑتون اوار اوار پاکستان تون اوار دنیا نا غٹ ملک آتیکن شونداری نا پوسکن ءُ وارخواہی فراوان کین۔ اوپارے کہ چینی صدر شی جن پنگ دہ سال مست انسانیت نا اسیجائی آخبت آ تالان راج اسے نا ٹہیفنگ نا نظریہ ءِ پیش کرے و اونا مسخت ئس کہ دا سوج انا ورندی ءِ پٹنگے کہ انسانیت ہراکنڈآ ہِننگ ءِ و ہراوڑ چین اونا آخبت نا جوڑ کننگ کن بنداو فراوان کننگ کیک۔ اوپارے کہ چینی قمری کلینڈر اٹ ڈریگن نا سال ءِ۔ چینی دودوربیدگ اٹ ڈریگن خوش بختی نا نشانی ءِ۔ ای غٹ پاکستانی ایڑھ ایلم تے ڈریگن سال انا مبارکبادی تننگ خواوہ و اومیت کیوہ پاکستان پین سوگو مرے، غٹ پاکستانی ڈریگن سال اٹی تینا خوش بختی ءِ دوئی کیر و تینا تغ تے پورو کننگ کیر۔
